Самарқанд вилоятида уч кунда айрим истеъмолчиларнинг энергия ресурсларидан ноқонуний фойдаланишлари натижасида тизимга 5 миллиард сўмлик зарар етказилгани аниқланди. Бу ҳақда Энергетика вазирлиги хабар берди.
7—9 февраль кунлари Энергетика вазирлиги ҳузуридаги “Ўзэнергоинспекция” томонидан Бош прокуратура, ИИВ, ҳамда электр ва газ таъминоти корхоналари ходимлари билан ҳамкорликда Самарқанд вилоятида ўтказилган назорат тадбирларида энергия ресурсларидан ноқонуний фойдаланилган 23 та ҳолат аниқланган.
Дастлабки ҳисоб-китобларга кўра, тизимга 5 миллиард сўмлик зарар келтирилган.
Хусусан, Пахтачи туманида “Х.Қ.С.” МЧЖга қарашли иссиқхона табиий газдан ноқонуний фойдаланиши натижасида 3 миллиард 300 миллион сўмлик зарар етказган. Ургут туманида эса “С.Н.” МЧЖга қарашли ишлаб чиқариш цехининг трансформатори ўзбошимчалик билан алмаштирилган бўлиб, ушбу ҳолат бўйича 700 миллион сўм миқдорида қайта-ҳисоб қилинган.
Қоидабузар истеъмолчиларга нисбатан белгиланган тартибда чора кўриш учун тегишли ҳужжатлар расмийлаштирилиб, ҳуқуқни муҳофаза этувчи органларга тақдим қилинган. Айни пайтда ҳудудларда назорат тадбирлари давом этмоқда.
Изоҳ (0)