Ўзбекистонда лицензияси бекор қилинган олий таълим ташкилотларининг бирор-бир талабаси кўчада қолмайди. Бу ҳақда Олий таълим, фан ва инновациялар вазирлиги матбуот хизмати хабар берди.
Қайд этилишича, нодавлат олий таълим ташкилотларида таълим жараёнини ташкил этиш ва лицензия талаблари бузилганлик ҳолатлари бўйича вазирликка келиб тушган норозилик мурожаатлари асосида текшириш натижаларига кўра, ҳозирга қадар лисензия талаблари ва шартларини қўпол равишда бузгани учун 6 та нодавлат олий таълим ташкилотининг тегишли лицензиясини бекор қилиш бўйича судга даъво аризалари киритилган. Шундан 5 тасининг тегишли лицензиялари суд қарорига кўра бекор қилинган бўлса, 1 та нодавлат олий таълим ташкилотининг лицензиясини бекор қилиш бўйича суд жараёни давом этмоқда.
Президент қарорига кўра, лицензияси бекор қилинган таълим ташкилоти ёки ёпилган таълим дастурида таҳсил олаётган талабаларга ўқишини давлат ва нодавлат таълим ташкилотларининг мос ва турдош таълим йўналишлари ва мутахассисликларига белгиланган тартибда кўчириш ҳуқуқи вазирликка берилган.
Шундан келиб чиқиб, бугунги кунга қадар суд жараёнлари тўлиқ якунланган ва лицензияси бекор қилинган олий таълим ташкилотлари — Valley Innovative University, Урганч шаҳридаги Бинари университетининг барча талабалари тегишли тартибда олий таълим ташкилотларига кўчирилган. Ҳозирда лицензияси бекор қилинган бошқа олий таълим ташкилотлари талабаларинининг ўқишини кўчириш ишлари ташкил этилмоқда.
“Вазирлик лицензияси бекор қилинган олий таълим ташкилотларининг бирор-бир талабаси кўчада қолмаслигини маълум қилади. Барча талабаларнинг аризасига асосан ўқиши белгиланган тартибда бошқа олийгоҳларга кўчирилиши таъминланади”, — дейилади хабарда.
Эслатиб ўтамиз, 2023 йил июль ўрталарида Олий таълим, фан ва инновациялар вазирлиги Ат-Термизий номидаги халқаро университетга олий таълим хизматларини кўрсатиш учун лицензия берилмаганини маълум қилганди. “Таълим тўғрисида”ги қонуннинг 29-моддасига асосан, нодавлат таълим ташкилотлари лицензия олинган кундан эътиборан таълим фаолияти билан шуғулланишга ҳақлидир.
Изоҳ (0)