Қайси хорижий давлатга ташриф буюришни хоҳлайсиз, деб сўрашса, рўйхат ичида Дубайни ҳам тилга олишингиз аниқ. Дунёнинг энг ажойиб мегаполисларидан бири бўлган шаҳарда кўриш керак бўлган 5 та диққатга сазовор жойлар билан танишамиз.
Expo City Dubai
Бир неча йил аввал Дубай Бутунжаҳон кўргазмасини ўтказиш ва ўзининг инновацион ғоялари ва ривожланишига дунё эътиборини жалб қилиш истагини эълон қилди. Натижада Expo City нафақат инновацион бинолар ва кўргазма майдонлари мажмуаси, балки Дубай маданий ва илмий алмашинув глобал марказига айланди.
Унинг ҳудудида табиат, инсон тараққиёти, янги инновацион технологиялар каби мавзуларни акс эттирувчи бир нечта майдонлар мавжуд. Сайёҳлар учун энг хайратланарли жой бу — 55 метрлик айланувчи Garden in the sky (“осмондаги боғ”) кузатув майдончасидир. Юқоридан сиз шаҳарнинг ажойиб манзарасини томоша қилишингиз мумкин.
Бурж Халифа
Дунёдаги энг баланд бино Бурж Халифа араб тилидан “Халифа минораси” деган маънони билдириб, баландлиги 828 метр, 130 дан ортиқ қавати бор. Бинони узоқдан кўрибоқ баъзи одамларнинг боши айланиб кетади. Адреналин ва янги таассуротларни севувчилар учун бинонинг юқори қаватларида махсус томоша майдони ташкил қилинган. Осмонўпар бинода турли офислар, савдо марказлари, меҳмонхоналар, спорт заллари, салонлар ва турар жой квартиралари мавжуд. Ичкарида сизни секундига 18 метр тезликда баландликка олиб чиқадиган бир нечта тезюрар лифтлар хизмат қилади.
Дубайленд
Ушбу кўнгилочар хиёбон Яқин Шарқнинг Диснейленди деб ҳам аталади. Сайёҳлар у ерда харидлар қилиши, кинотеатр ёки аквапаркка бориши, кафеда дам олиши ёки шунчаки сайр қилиши мумкин.
Дубайленд шаҳар марказидан тахминан 20 километр узоқликда жойлашган. Ичкарида мажмуа етти нафар зонага бўлинган. Шунингдек, экотуризм ва спорт комплексларини ҳам айнан Дубайлендда топасиз. Мажмуа ҳудудида Логоленд номли истироҳат боғи мавжуд. Умуман олганда, бу ерда сайёҳлар фаол дам олиши учун барча шароитлар етарли.
Келажак музейи
2022 йилда очилган ушбу эстетик музей мамлакат ва бутун инсоният келажаги, илғор технологиялар ва ҳаётнинг турли соҳаларидаги тараққиётга бағишланган. 7 қаватдан иборат бино ички таянчларсиз қурилган бўлиб, дарҳол сайёҳларнинг эътиборини тортади. Устки қисми зангламайдиган пўлат билан қопланган, фасади араб хаттотлигида келажак ҳақидаги иборалар билан безатилган.
Музейдаги экскурсия аввал юқори қаватдан бошланади. Унда космик тадқиқот, экотизим, биология муҳандислиги, соғлиқни сақлаш, энергетика, робототехника ва сунъий интеллектга оид дастурлар ўрин олган. Энг сўнгги — биринчи қават болалар учун бағишланган майдондан иборат.
Дубай опера театри
Дубай опера театри 2016 йилда ғайриоддий дизайнда қурилган. Бинонинг ташқи кўриниши шиша кемага ўхшаб кетади ва 2000 нафар томошабинга мўлжалланган ҳашаматли залдан иборат. Театр саҳнасида барча турдаги дастурлар: спектакллар, опера ва балет, жаҳон юлдузларининг симфоник ва жазз концертлари, эстрада юлдузларининг чиқишлари, кўнгилочар шоулар ўтказилади. Театр томида эса Sky Garden ресторани жойлашган.
Изоҳ (0)