“Толибон” ҳаракатининг собиқ матбуот котиби ўринбосари Билол Каримий Афғонистоннинг Пекиндаги элчиси бўлди. Шу тариқа Хитой дунёда “Толибон” билан энг юқори дипломатик даражада алоқа ўрнатган биринчи давлат бўлди.
Ишонч ёрлиқларини топшириш маросими 30 январь куни Пекиндаги Халқ мажлислари залида бўлиб ўтган. Унда 42 давлатдан келган янги элчилар дипломатик ҳужжатларни Си Цзиньпинга топширган ва шундан сўнг де-юре ўз вазифасини бажаришга киришган. 2023 йил сентябрь ойида Хитой ҳукумати ҳам “Толибон” ҳокимиятга келганидан сўнг дунёда биринчи бўлиб Кобулга ўз элчисини тайинлаган эди.
АҚШнинг бунга муносабати қандай?
АҚШ Давлат департаменти матбуот котиби Метю Миллер Хитой раисининг “Толибон” элчисидан ишонч ёрлиқларини қабул қилишига жавобан, Пекиннинг “Толибон”ни тан олиш борасидаги позицияси ҳалигача ноаниқ эканини айтди.
У Хитой ва “Толибон” ўртасидаги мавжуд муносабатлар АҚШнинг “Толибон”ни тан олиш борасидаги сиёсатини ўзгартирмаслигини яна бир бор таъкидлаб, толиблар тан олинишга сазовор бўлиш учун аниқ қадамлар қўйиши, жумладан, аёлларнинг мавқейини ошириши кераклигини таъкидлади.
Изоҳ (0)