Қашқадарё вилоятининг Китоб туманида алиментдан қарздор фарзандлар отаси учун 15 минг доллар алимент пулларини тўлаб бергач, бу ҳақдаги ижро ҳужжати тугатилди.
МИБнинг Қашқадарё вилояти бошқармаси ахборот хизмати масъули Гулноза Дилмуродованинг “Дарё”га билдиришича, Фуқаролик ишлари бўйича Шаҳрисабз туманлараро суди қарорига асосан фуқаро З.З. фойдасига уч нафар фарзандларидан алимент ундириш белгиланган.
Фуқаролик ишлари бўйича Шаҳрисабз туманлараро судининг 2023 йил 13 апрелдаги ижро варақасига асосан фуқаро З.З. фойдасига уч нафар фарзандидан алимент ундириш белгиланганди. Мазкур ҳужжат ижросини таъминлаш давомида МИБ ходимлари алимент тўлаш мажбуриятини олган фарзандларга бу ҳақда тушунтириш ишларини олиб борди. Жорий йилнинг 10 январь куни тарафлар ўзаро келишгач, фарзандлар отаси учун 15 минг доллар миқдоридаги пул маблағини тўлаб берди. Шу муносабат билан ижро ҳужжати ижроси тамомланди, — дейди Гулноза Дилмуродова.
Масъулнинг қўшимча қилишича, МИБ ҳаракати билан ўз ота-оналарига алимент тўлашдан бўйин товлаб келган фарзандлар қамалмаслик учун алимент тўловларини тўлаб бермоқда.
Жумладан, алиментдан бўйин товлаб келган фарзандлар М.М. фойдасига 11 ой учун 3 миллион 465 минг, Ш.Б. фойдасига 8 ой учун 1 миллион 840 минг сўм пулларни тўлаб беришди, — дейди у.
Гулноза Дилмуродованинг қўшимча қилишича, Қашқадарёда бугунги кунда 124 нафар ота-она ўз фарзандларидан алимент ундириб келади.
Изоҳ (0)