Экология, атроф-муҳитни муҳофаза қилиш ва иқлим ўзгариши вазирлиги томонидан Тошкент вилоятининг Зангиота, Тошкент, Қибрай, Янгийўл туманларида жойлашган иссиқхоналар фаолияти ўрганилмоқда.
Қайд этилишича, бундан мақсад Тошкент шаҳри атмосфера ҳавосининг ифлосланиш даражаси ортиб бораётгани, шунингдек, юқоридаги ҳудудларда атмосфера ҳавосини сезиларли ёмонлашгани ҳақида ижтимоий тармоқларда тарқалган турли мурожаатлар юзасидан экологик мониторинг ўтказишдир.
Таъкидланишича, кўмирдан фойдаланадиган иссиқхоналар атмосфера ҳавоси ифлосланишининг асосий сабабларидан бири бўлиб қолмоқда. Охирги беш йилда иқтисодиётда кўмир истеъмолининг ўсиш суръати 22 фоиздан ошган. Агар 2018 йилда 6,8 миллион тонна кўмир ишлатилган бўлса, 2022 йилда бу рақам 8,3 миллион тоннадан ортган.
“Мониторинг давомида иссиқхоналарда фойдаланилаётган ёқилғи турлари, ёқиш қурилмаларининг ҳолати тўлиқ хатловдан ўтказилмоқда. Шунингдек, иссиқхоналарга берилган давлат экологик экспертизасининг хулосаларида белгиланган меъёрларга риоя этилганлиги ўрганилмоқда”, — дейилади хабарда.
Шу билан бирга, иссиқхоналарда атмосфера ҳавосини ифлослантирувчи асосий ташланма манбалардан ҳосил бўладиган ифлослантирувчи газларни тозалаш қурилмалари ўрнатилгани ҳам текширилмоқда. Ҳар бир иссиқхонага қонуний тартибда фаолият кўрсатиш лозимлиги, акс ҳолда тегишли чоралар кўрилиши тўғрисида огоҳлантириш хатлари берилмоқда.
Аввалроқ 3 январь куни Тошкент шаҳри дунёнинг ҳаво сифати энг ифлос шаҳарлари рейтингида 4-ўринга чиққани хабар қилинганди. Бундай ҳавода шаҳар аҳолисига кўчада ниқоб тақиб юриш, деразаларни очмаслик, уй ичини намлантирувчи воситалар билан тозалаш тавсия этиб келинади.
Ўз навбатида Тошкент вилояти ҳокимлиги ижтимоий тармоқларда кўмир сифатининг ҳаво ифлосланишига салбий таъсири кўрсатилган видеолавҳаларга муносабат билдирганди.
Изоҳ (0)