Ўзбекистоннинг уч вилоятида яширин цехда ишлаб чиқарилган алкогол маҳсулотларини муомалага киритилишининг олди олинди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Хабарга кўра, ҳолат Бош прокуратура ҳузуридаги департаментнинг Яккабоғ туман бўлими томонидан ўтказилган тезкор тадбирларда аниқланган. Икки нафар фуқаро ноқонуний даромад орттириш мақсадида Қамаши туманидаги “Оқгузар” ва Яккабоғ туманидаги “Чайдари” МФЙ ҳудудида жами 1 224 дона “Янги Шаҳрисабз” ва “Шаҳрисабз ароғи” номли қалбаки акциз маркали алкогол маҳсулотини бошқа фуқароларга сотган вақтларида ашёвий далиллар билан ушланган.
Департаментнинг Тўрткўл туман бўлими томонидан ИИБ ходимлари билан ҳамкорликда ўтказилган тезкор тадбирда фуқаро С.С. “Шўрахон” ОФЙ ҳудудида яшовчи фуқаронинг уйида яширин цех ташкил қилиб, истеъмолга яроқсиз “Қаратау” номли алкогол маҳсулотларини ишлаб чиқараётгани аниқланиб, ушбу хонадондан 912 дона қалбаки акциз марка, 378 дона тайёр маҳсулот, 240 литр алкогол маҳсулоти, 172 дона маркировка, 45 литр спирт ва бошқа ишлаб чиқаришда фойдаланилган товар-моддий бойликлари ашёвий далил сифатида олинган.
Шу каби департаментнинг Бандихон туман бўлими томонидан ИИБ ходимлари билан ҳамкорликда ўтказилган тезкор тадбирда “А.” хусусий корхонаси савдо дўкони раҳбари А.Б. 150 дона “Журавли” номли қалбаки акциз маркали алкогол маҳсулотини сотаётган вақтида ушланиб, ушбу савдо дўконидан яна 375 дона қалбаки акциз маркали алкогол маҳсулоти ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)