Америкалик кимёгар профессор Мишел Франкл чойнинг мукаммал таъми учун бир чимдим туз қўшиш кераклигини маълум қилди. Бу АҚШ ва Буюк Британияда дипломатик можарони келтириб чиқарди.
Профессор ўзининг янги нашрдан чиққан “Қайнатилган: чой кимёси” китобида ичимлик тайёрлаш жараёнига илмий нуқтаи назардан ёндашган. Франкл сўнгги минг йилликда синаб кўрилган чой тайёрлашнинг бир неча юзлаб усуллари таҳлили натижаларини тақдим этади. Бунда асосий урғу уч нарсага: чойга бир оз туз қўшиш, иссиқ сут солиш ва пакетли чойни ботириб, ботириб сиқиб қўйишга қаратилган.
Унинг тавсиялари қуйидагича: чойли пакетни узоқ вақт қайнатиб бўлмайди, уни бир неча марта сувга ботириб, сиқиб қўйиш керак. Бу аччиқликни юмшатади. Чой пакети қанчалик катта бўлса, шунча яхши, сабаби ичидаги барглар қайноқ сув билан алоқада бўлиб, эркинроқ ҳаракатланади. Франкл баргли чой, албатта, пакетли чойдан яхшироқ эканини таъкидлайди.
Кружканинг ичи кенг, баланд бўлмаслиги ва ҳарорати илиқ бўлиши керак. Ичимлик юзасидаги плёнкани олиб ташлаш учун чойга бир чимдим туз қўшиш керак, сабаби натрий ионлари аччиқликни “олиб ташлайди”. Ниҳоят, сутни чойга қуйиш керак, аксинча эмас.
Бундай маслаҳат инглизларнинг норозилигига сабаб бўлди, улар чойни ўзларининг миллий ичимлиги деб ҳисоблайдилар. Daily Mail мақоласи остидаги изоҳларда, британлар “америкаликларга чой тайёрлашга ёрдам беришларига” йўл қўймасликларини ёзади. Франклнинг маслаҳати бўйича материаллар Тhе Guardian, Тhе Daily Telegraph ва Буюк Британиянинг бошқа етакчи оммавий ахборот воситаларида ҳам чоп этилган.
АҚШнинг Британиядаги элчихонаси чойга туз қўшиш таклифига ўта салбий муносабатда бўлиб, “бу икки давлат муносабатларига таҳдид солишини билдирган.
“Биз Британия фуқароларини ишонтириб айтмоқчимизки, Буюк Британиянинг миллий ичимлигига туз қўшиш ҳақидаги ақл бовар қилмайдиган ғоя Қўшма Штатларнинг расмий сиёсати эмас. Ҳеч қачон бўлмайди. Чой – дўстлик эликсири, халқларимизни бирлаштирган муқаддас ришта. Бундай ғайритабиий таклиф Британия билан муносабатларимиз ўзагига таҳдид солаётгани учун жим туролмаймиз”, — дейилади элчихонанинг Х (собиқ Twitter) да эълон қилинган баёнотида.
Америка элчихонасининг фикрича, Франклнинг “Steeped: The Chemistry of Tea” (Қайнатилган: чой кимёси) китоби нашр этилгандан сўнг чой тайёрлаш бўйича фаол муҳокама “Буюк Британия билан бўлган алоҳида алоқани мустаҳкамлади”.
“Келинг, чуқур бирдамлигимизда бирлашайлик ва дунёга чой ҳақида гап кетганда, биз ҳамжиҳат эканимизни кўрсатайлик. АҚШ элчихонаси чойни тўғри усулда — микротўлқинли печда тайёрлашда давом этади”, — дея хулоса қилади Америка миссияси.
Чой АҚШ ва Буюк Британия ўртасидаги дипломатик келишмовчиликларга биринчи марта сабаб бўлаётгани йўқ, деб эслайди Sky News. 1773 йилдаги Бостон чой зиёфати пайтида намойишчилар Британия маҳсулотга солиқ жорий этганига норозилик билдириш учун бутун чойни денгизга улоқтирган. Бу Америка инқилобини қўллаб-қувватлашни кучайтирган муҳим лаҳза эди.
Изоҳ (0)