Ўзбекистон ташқи ишлар вазирининг биринчи ўринбосари Баҳромжон Аълоев бошчилигидаги делегация Уганданинг Кампала шаҳрида бўлиб ўтган Қўшилмаслик ҳаракатининг 19-саммитида иштирок этди. Бу ҳақда ТИВ матбуот хизмати хабар берди.
Қайд этилишича, тадбирда 100 дан ортиқ давлат делегациялари, жумладан, давлат, ҳукумат, ташқи ишлар идоралари раҳбарлари ва уларнинг ўринбосарлари иштирок этган.
Учрашувда халқаро кун тартибидаги долзарб масалалар юзасидан фикр алмашилган, шунингдек, глобал миқёсда тинчлик ва барқарорлик ҳамда ижтимоий-иқтисодий тараққиётни таъминлашда ҳаракатнинг мавжуд салоҳиятидан фойдаланиш бўйича таклифлар кўриб чиқилган.
Ўзбекистон делегацияси 2027-2029 йилларда Қўшилмаслик ҳаракати раислигига Ўзбекистон номзодини қўллаб-қувватлаганликлари учун ҳаракатнинг барча аъзоларига миннатдорлик билдириб, иштирокчиларни Ўзбекистонда жамиятнинг барча соҳаларида амалга оширилаётган кенг кўламли ва жадал ислоҳотларнинг асосий йўналишлари ҳақида маълумот берган.
“Транспорт-логистика соҳасидаги ҳамкорликни ривожлантириш, иқтисодий ва молиявий тизимларни такомиллаштириш, иқлим ўзгаришига қарши курашиш ва атроф-муҳитни муҳофаза қилиш муҳимлигига алоҳида эътибор қаратилди. Илм-фан ва инновацион технологиялар соҳасида ўзаро ҳамкорлик ва тажриба алмашишни кучайтириш, ёш авлодни қўллаб-қувватлаш зарурлиги қайд этилди”, — дейилади хабарда.
Эслатиб ўтамиз, 2023 йил март бошларида Шавкат Мирзиёев Қўшилмаслик ҳаракатининг махсус мониторинг ва илмий тадқиқот тармоғини ташкил қилишни таклиф қилганди. “Албатта, бундай қийин ва мураккаб синовларни фақатгина биргаликда, бир-биримизни яқиндан қўллаб-қувватлаган ҳолда енга оламиз. Шу маънода, Ўзбекистон 2030 йилга қадар мўлжалланган Сендай ҳадли дастурининг асосий мақсадларига эришиш бўйича глобал платформа фаолиятини янада кучайтириш тарафдоридир”, — деганди президент.
Изоҳ (0)