Олмаотадаги мактаб ва коллежларда 23 январь куни биринчи сменада дарслар бекор қилинди —таълим муассасалари тунда аҳолини қабул қилиш пункти сифатида ишлаган. Бу ҳақда шаҳар таълим бошқармасига таяниб “Нур.кз” хабар берди.
Боғчалар одатдагидек ишлайди, болалар боғчасига ташрифлар ота-оналарнинг сўровига биноан амалга оширилади, деб таъкидлади бошқарма.
Тунда Олмаотада икки марта ер силкиниши сезилди. Шаҳар аҳолиси 23 январь куни эрталаб 2 балл кучли силкинишни ҳис қилди, деб хабар қилди Олмаота вилояти Фавқулодда вазиятлар департаменти матбуот хизмати Telegram-каналида. Департамент маълумотларига кўра, 5,8 магнитудали зилзила эпицентри Хитой ва Қирғизистон чегарасида жойлашган. Зилзила кучи Ўзбекистонда ҳам сезилган.
Европа Ўрта Ер денгизи сейсмология маркази (ЭМСC) зилзила магнитудасини 5,7 деб баҳолади. Зилзила Шинжон-Уйғур автоном районида содир бўлган, эпимаркази 10 километр чуқурликда жойлашган. 40 дақиқадан сўнг ўша ҳудудда 4,9 магнитудали янги зилзила бошланди, 17 дақиқадан сўнг эса худди шундай магнитудали иккинчи зилзила содир бўлди. Шунингдек, тахминан соат 00:07да (Тошкент вақти билан 05:07) Қозоғистоннинг шарқий вилоятларида 3,3 магнитудали зилзила бошланди.
Республика Фавқулодда вазиятлар вазирлиги маълумотларига кўра, бир соат ичида Олмаота аҳолиси яна 2-3 балли силкинишни ҳис қилган. Департамент одамларни ташқарига чиқишга чақирди. Кейинроқ департамент Олмаотада қурбонлар ва вайронагарчиликлар ҳақида маълумот йўқлигини маълум қилди.
Изоҳ (0)