Олий Мажлиснинг Инсон ҳуқуқлари бўйича вакили (омбудсман)нинг Қорақалпоғистондаги минтақавий вакили Қўнғирот туманидаги 27-сон манзил-колониясига мониторинг ташрифини амалга оширганида, маҳкумлар меҳнат ҳуқуқларининг бузилаётгани бўйича шикоят қилди. Бу ҳақда омбудсман матбуот хизмати хабар берди.
Қайд этилишича, омбудсман минтақавий вакили маҳкумларнинг шартнома асосида меҳнатга жалб этилган учта МЧЖлардаги меҳнат ва яшаш шароитларини ўрганган. Ўрганишлар давомида ушбу корхоналардаги шароитлар белгиланган талабларга жавоб бермаслиги аниқланган. Шунингдек, 100 нафардан ортиқ маҳкумнинг ойлик маоши тўлаб берилмагани маълум бўлган.
Мазкур ҳолат омбудсман назоратига олиниб, аниқланган салбий ҳолатларни бартараф этиш юзасидан ИИВ ҳузуридаги Жазони ижро этиш департаментига тақдимнома киритилган.
Мазкур тақдимнома кўриб чиқилиши натижасида, маҳкумларга 2023 йил август—сентябрь ойлари учун иккита МЧЖдан жами 186 миллион сўмдан ортиқ иш ҳақи ундириб берилди.
Шунингдек, мазкур МЧЖларнинг биттасида маҳкумларнинг яшаш шароитида аниқланган камчиликлар бартараф этилган. Қолганлари билан тузилган шартномалар 27-сон манзил-колония томонидан бекор қилинган.
“Маҳкумларнинг иш ҳақини ундириш бўйича ишлар давом эттирилмоқда. 2023 йилнинг декабрь ойида 27-сон манзил-колония томонидан 25 нафар маҳкумнинг иш ҳақини ундириш бўйича судга даъво ариза киритилган”, — дейилади хабарда.
Аввалроқ омбудсман Навоийдаги колонияда Нукус воқеалари бўйича қамалган Даулетмурат Тажимуратов билан учрашгани тўғрисида хабар берилганди.
Изоҳ (0)