Актёр Асқар Ҳикматов томошабинларга комик роллари билан яхши таниш. Аммо кўпчилик у ҳақида деярли ҳеч қандай маълумотга эга эмас.
Асқар Ҳикматов 1987 йилнинг 19 декабрида Тошкент шаҳрида таваллуд топган. У оилада уч ўғилнинг каттаси.
— 4-5 синфга қадар келажакда қайси касбни танлашимни билмасдим. Актёрликка-ку умуман қизиқиш бўлмаган. Оила аъзоларим орасида ҳам санъаткорлар йўқлиги учун актёр бўлиш етти ухлаб тушимга ҳам кирмаганди. Бир куни синфдош дўстим тўгаракка қатнаётгани ҳақида айтиб қолди. Борсак, тўгаракларнинг сони ниҳоятда кўп экан. Ўшанда “Актёрлик тўгарагига қатнашганларни телевизорга олиб чиқишаркан”, деган гап қулоғимга чалиниб қолган. Экранда кўриниш орзуси билан шу драма тўгарагига қатнаганман. “Сенда ўхшаяпти, зўр ижро этяпсан”, деган мотивация катта куч бағишлаган. Шундан кейин санъат коллежидан, ундан институтга ўқишга кирганман. У пайтлари ҳам кўрсатув ва телелойиҳаларга таклифлар кўп бўларди. Аммо чиқишни истамасдим. “Биринчи уринишда зўр роль ижро этаман”, деб ният қилардим, — дейди актёр Асқар Ҳикматов.
Актёр илк ролини институтнинг иккинчи босқичида ўқиб юрган пайтида устози Жаҳонгир Аҳмедовнинг “Тундан тонггача” фильмида ижро этган.
— У пайтда Жаҳонгир ака магистратура босқичида ўқирди, шу билан бирга бизга дарс ҳам ўтарди. Устоз билан яхши келишардик, аммо ижодий ишлари сабаб дарсларни бошқа педогогларга топширди. Бир куни “Асқар янги фильм бошламоқчиман, битта кичик роль бор сени синаб кўрамизми?” деди. Илк ролимни “Тундан тонггача” фильмида ижро этганман. У пайтгача ҳатто, клипда ҳам суратга тушмаганим учун ҳаяжонланганман. Алишер Узоқов билан роль ижро этиш катта шараф эди-да. Фильм машҳурликка эришганида кўча-куйда одамлар “бананчи бола” деб чақирадиган бўлган, — дейди Асқар Ҳикматов.
Актёр кино сабаб Мирфаёзга айлангани ва анча вақтгача одамлар уни исм-шарифи билан эмас, қаҳрамон номи билан атагани ҳақида айтиб ўтди.
— “Менинг дўстим жин” фильмидан кейин ҳамма Мирфаёз дейишни бошлаган. Исм-шарифимни билишмасди. Бу фильмнинг мухлисларининг кўпчилигини болалар ташкил қилгани учун кўча-куйда “Мирпиёз” деб мазаҳ қилишарди. Биринчи марта кўчада исм-шарифим билан чақиришганда йиғлаб юборганман. Кимгадир эриш туюлиши мумкин, аммо одамлар оғзидан исм-фамилиямни эшитиб хурсанд бўлиб кетганман, — дейди Асқар Ҳикматов.
Актёр аёли билан қандай танишгани ва унинг рашкчилигидан безор бўлгани ҳақида гапирди.
— Ҳамма йигитларга айтилганидек менга ҳам “Қачон уйланасан, катта йигит бўлиб қолдинг”, деб кўп гапиришган. Уйимизда қизларнинг расми шу қадар кўп эдики, кўзим тушиши учун ҳатто музлаткичга ҳам ёпиштириб қўйишарди. Маҳбуба билан ҳам совчилик орқали танишганмиз. У пайтда банкда ишларди. Секингина банкка бориб қизни кўриб кел, дейишган. Аммо талаб бўйича у ишлайдиган бўлимга поспорт билан киритилар экан. Аксига олиб ёнимда шахсимни тасдиқловчи ҳужжат бўлмагани учун киролмаганман.
Кейин кўчада учрашадиган бўлдик. У пайтда машинам бўлмагани учун хонанда Тоҳир Усмоновдан илтимос қилганман. Аммо учрашувга чиққанда совға олиш ҳам эсимдан чиққан. Чунки ўша пайтда қайсидир фильмнинг съёмкаси билан банд эдим. Дўстларим учрашувга гул ва ширинликни етказиб олиб келган.
Аввалига аёлим жуда рашкчи эди. Тинимсиз қўнғироқ қилиб “Қаердасиз? Нечида келасиз?”, деб сўрайверарди. Айниқса, биринчи фарзандимизга ҳомиладорлигида ўта рашкчи бўлиб қолганди. Ҳозир анча кўникиб қолган, актёрнинг ҳаётида яшашга ўрганди, — дейди Асқар Ҳикматов.
Актёр тўйи куни содир бўлган қизиқарли воқеа ҳақида ҳам сўзлаб берди.
— Маҳбуба билан танишганимиздан кейин икки ой ўтиб тўй қилганмиз. Никоҳ оқшоми айни қизиган пайт аёлим секин туртиб “Негадир ҳаво етмаяпти”, деган. Олдига ўтиб, уни ташқарига олиб чиққанман. Энг қизиғи, келин-куёв йўқлигини кўпчилик сезмай қолган. Ташқарига олиб чиқиб, бир оз ҳаво алмаштирганман, кейин келиб яна жойимизга ўтирганмиз. Ўшанда баъзи инсонлар “Тўйи куни йўқолиб қолди”, деб гап қилишган экан. Менга-ку, бу гаплар таъсир қилмаган, аммо аёлим ўйлаб сиқилганди, — дейди актёр Асқар Ҳикматов.
Айни кунларда асосан вайн йўналишида ижод қилаётган Асқар Ҳикматов қимирлайдиган қулоқларининг сирини фош қилди.
— Қимирлайдиган қулоқлар ажойиб топилма бўлган. Кўпчилик “Буни қандай суратга оласизлар? Монтаж қиласизларми?” деб сўрайди. Унинг сири жуда оддий. Қулоқларимга рангсиз ип боғлашади ва юқоридан уни гапимга мослаб тортиб туришади. Қарабсизки, қулоқлари қимирлайдиган қайнота образи пайдо бўлади, — дейди Асқар Ҳикматов.
Асқар Ҳикматов оилали, икки нафар фарзанднинг отаси. Аёли банкдаги фаолиятини якунлаб ҳозирги кунда болалар уқаловчиси бўлиб ишлайди. Актёр кино ва ижтимоий тармоқлардаги фаолиятидан ташқари, Ёш томошабинлар театрида ҳам ишлайди.
Изоҳ (0)