Тошкентда уй-жой ижараси нархи пасайди

Иқтисодий тадқиқотлар ва ислоҳотлар маркази ўзининг навбатдаги шарҳида кўчмас мулк бозорида юз берган ўзгаришларни таҳлил қилди.

Унга кўра, ноябрь ойида Ўзбекистон кўчмас мулк бозорида икки ойлик пасайишдан фаоллик ўса бошлади. Мутахассислар ҳозирги бозор ҳолатини ўртача барқарор деб ҳисоблайди.

Тошкентда ноябрь ойида кўчмас мулк савдоси 4 фоизга ошди, бу аввалги ойга нисбатан 800 та уй-жойга кўпроқ. Ой давомида фаолликнинг энг кўп ўсиши қуйидаги вилоятларда қайд этилди:

• Хоразм — 23 фоиз,
• Наманган — 16 фоиз,
• Жиззах  — 12 фоиз .

Йил давомида уй-жой савдоси 10 фоизга камайди. Фаолликнинг энг кўп пасайишини кўрсатган ҳудудлар Навоий ва Жиззах вилоятлари бўлиб, мос равишда 23 фоиз ва 18 фоизга пасайган. Пойтахтда сотувлар ўтган йилга нисбатан 24 фоизга камайди.

Тошкентда уй-жой ижараси бозоридаги вазият

Ноябрь ойида Тошкент шаҳрида ижаранинг ўртача нархи октябрь ойидаги 9,5 долларга нисбатан 2,1 фоизга бир оз пасайди ва 1 квадрат метр учун 9,3 долларни ташкил этди. Пойтахтнинг 11 та туманидан 10 тасида ижара нархининг пасайиши қайд этилди.

Ижара учун энг қиммат ҳудудлар Шайхонтоҳур (квадрат метр 11,6 доллар), Яккасарой (10,9 доллар) ва Миробод (11,5 доллар) туманлари бўлди.

Пойтахтдаги уй-жой ижараси Учтепа (8,1 доллар), Сергели (7,1 доллар) ва Бектемир (6,2 доллар) туманларида энг мақбул нархларда қолмоқда. Шу билан бирга, пойтахтда ўртача ижара нархи ўтган йилга нисбатан 6,1 фоизга камайди. Йил бошидан буён ижаранинг ўртача нархи 9,2 фоизга камайди.

Тошкентда ижара нархи бир ой ичида фақат Бектемир туманида 3,7 фоизга ошди.

Иккиламчи кўчмас мулк бозори

Ноябрь ойида иккиламчи бозорда уй-жой нархининг ўртача ўсиши бир квадрат метр учун 0,7 фоизни ташкил этди, ўтган йилнинг ноябрь ойидан буён иккиламчи уй-жой нархи деярли 18,2 фоизга ошди.

Йил давомида Хоразм — 32,9 фоиз, Тошкент — 31,0 фоиз ва Бухоро — 26,9 фоиз вилоятларида иккиламчи бозорда уй-жой нархининг сезиларли ўсиши қайд этилди.

Тошкент шаҳрида ноябрь ойи давомида иккиламчи уй-жой нархи 0,4 фоизга ошди. Пойтахтда нархларнинг энг юқори ўсиш суръатлари Шайхонтоҳур — 1,7 фоиз, Юнусобод — 1,6 фоиз ва Сергели — 1,5 фоиз туманларида кузатилди.

Йил давомида пойтахтда иккиламчи уй-жойларнинг ўртача нархи 22,8 фоизга ошди.