АҚШ йил охиригача Украинага ҳарбий ёрдамнинг янги пакетини эълон қилмоқчи, деди Миллий хавфсизлик кенгашининг стратегик алоқалар бўйича координатори Жон Кирби.
“Сиз шу ой охиригача қўшимча хавфсизлик ёрдами ҳақидаги эълонни эшитасиз, деб умид қиламан”, — деди у Оқ уйдаги брифингда.
Кирбининг қўшимча қилишича, сешанба куни Оқ уйда бўлиб ўтадиган учрашувда АҚШ президенти Жо Байден Владимир Зеленскийни Украинани қўллаб-қувватлашни давом эттириш учун янги маблағ ажратиш сўровини Конгресс маъқуллашини сўраш ниятида эканлигига ишонтиради.
Аввалроқ Россия Украинага қурол етказиб бериш юзасидан НАТО давлатларига нота юборган эди. Россия ташқи ишлар вазири Сергей Лавров Украина учун қурол бўлган ҳар қандай юк Россия учун қонуний нишонга айланишини таъкидлади.
Россия Ташқи ишлар вазирлиги НАТО давлатлари Украинага қурол етказиб бериш орқали “ўт билан ўйнамоқда” деб таъкидлади. Россия президенти матбуот котиби Дмитрий Песковнинг таъкидлашича, Украинага Ғарбдан қурол-яроғлар юборилиши Россия-Украина музокараларининг муваффақиятига ҳисса қўшмайди ва салбий таъсир кўрсатади.
Лавровнинг таъкидлашича, Қўшма Штатлар ва НАТО Украинадаги можарода нафақат қурол-яроғ етказиб бериш, балки Буюк Британия, Германия, Италия ва бошқа мамлакатларда кадрлар тайёрлаш орқали ҳам бевосита иштирок этмоқда.
Изоҳ (0)