“Ўзбекистон Республикаси президенти ҳузуридаги Стратегик ислоҳотлар агентлиги фаолиятини янада такомиллаштириш чора-тадбирлари тўғрисида”ги президент фармони имзоланди.
Ҳужжатга мувофиқ, президент ҳузуридаги Стратегик ислоҳотлар агентлигига қуйидаги қўшимча вазифалар юкланди:
- жамоатчилик, етакчи хорижий экспертлар, консултантлар ва маслаҳатчиларни кенг жалб қилган ҳолда аҳолини ташвишга солаётган масалалар ва муаммоларга ечим топиш ҳамда ижтимоий соҳа, иқтисодиёт ва бошқа аҳамиятга эга бўлган йўналишларни трансформация қилиш бўйича истиқболли ташаббусларни ишлаб чиқиш;
- ижтимоий соҳа, иқтисодиёт ва бошқа аҳамиятга эга бўлган йўналишларда хориж мамлакатларида амалга оширилаётган ислоҳотлар ва илгари сурилаётган ташаббусларни (шу жумладан, хорижий давлатлар раҳбарларининг чиқишлари ва нутқларини) ўрганишни ташкил қилиш, мамлакатдаги ишларнинг жорий ҳолатини таҳлил қилган ҳолда уларни Ўзбекистон шароитида имплементация қилиш бўйича таклифларни ишлаб чиқиш;
- халқаро ташкилотлар ва молия институтлари, консалтинг компаниялари, етакчи хорижий илмий-тадқиқот ва эксперт муассасалари ҳамда мутахассисларнинг тавсияларини таҳлил қилиш ва умумлаштириш, мақбул ташаббусларни имплементация қилиш бўйича таклифлар тайёрлаш;
- истиқболли ташаббусларни ишлаб чиқиш юзасидан республиканинг илмий ташкилотлари билан яқиндан ҳамкорлик қилиш.
Қуйидаги давлат ва жамоат ташкилотлари агентлик билан фаол ҳамкорликни амалга оширади:
- Олий таълим, фан ва инновациялар вазирлиги;
- Адлия вазирлиги;
- Статистика агентлиги;
- Ўзбекистон президенти ҳузуридаги Стратегия ва минтақалараро тадқиқотлар институти;
- “Юксалиш” умуммиллий ҳаракати;
- “Тараққиёт стратегияси” маркази;
- “Ижтимоий фикр” республика жамоатчилик фикрини ўрганиш маркази;
- “Ватандошлар” жамоат фонди.
Ҳужжат қонун ҳужжатлари маълумотлари миллий базасида эълон қилинган ва 2023 йил 9 ноябрдан кучга кирди.
Ноябрь бошларида Шуҳрат Вафоев Ўзбекистон президенти ҳузуридаги Стратегик ислоҳотлар агентлиги бош директори лавозимидан озод этилганди.
Изоҳ (0)