“Ер ва ерости бойликларини асраб қолиш ва муҳофаза қилишдаги қонунчилик такомиллаштирилиши муносабати билан Жиноят кодексига ҳамда Маъмурий жавобгарлик тўғрисидаги кодексга қўшимча ва ўзгартиришлар киритиш тўғрисида”ги қонун лойиҳаси эълон қилинди.
Қонун лойиҳаси билан фуқаролар томонидан ер бериш тартибини бузиш ҳамда ер тузиш лойиҳаларидан ўзбошимчалик билан четга чиқиш, давлат ер кадастри юритиш қоидаларини бузиш билан боғлиқ ҳуқуқбузарликларни аниқлаш ва ушбу ҳуқуқбузарлик учун маъмурий баённома расмийлаштириш ваколати профилактика инспекторларига ҳам берилиши кутилмоқда.
Ҳужжатда қайд этилишича, ҳуқуқбузарликларни расмийлаштиришдаги мавжуд тизим, ҳуқуқбузарларни маъмурий тартибда ИИБ ёки таянч пункт биносига келтириш, шу ернинг ўзидагина уларнинг хатти-ҳаракатларини ҳужжатлаштириш билан боғлиқлиги, фуқаролар учун ҳам жиддий сунъий равишдаги ноқулайликлар, оворагарчиликларни туғдиришига, улар томонидан турли эътирозлар билдирилишига сабаб бўлмоқда.
Ер тўғрисидаги қонун бузилиши ҳолатларини аниқлаш ваколати ИИВ Тезкор-қидирув департаменти ва унинг қуйи тизимларида ташкил этилган Ер ресурслари талон-торож қилинишига қарши курашиш бўлинмаларига юклатилгани, ушбу бўлинмалар ходимларининг сони камлиги, ҳар бир маҳаллага кириб бориш имконияти йўқлиги боис, бу турдаги ҳуқуқбузарликлар кам аниқланаётганлиги сабабли профилактика инспекторларига Маъмурий жавобгарлик тўғрисидаги кодекснинг 66 (ер бериш тартибини бузиш) ва 68-моддалари (ер тузиш лойиҳаларидан ўзбошимчалик билан четга чиқиш, давлат ер кадастри юритиш қоидаларини бузиш) бўйича маъмурий баённома расмийлаштириш ваколатини бериш зарурати юзага келди.
Таклиф этилаётган қонун лойиҳасининг қабул қилиниши натижасида фуқаролар томонидан ер бериш тартибини бузиш ҳамда ер тузиш лойиҳаларидан ўзбошимчалик билан четга чиқиш, давлат ер кадастри юритиш қоидаларини бузиш билан боғлиқ ҳуқуқбузарликларни аниқлаш ва ушбу ҳуқуқбузарлик учун маъмурий баённома расмийлаштириш ваколати профилактика инспекторларига берилиб, ушбу ҳуқуқбузарликларни содир этилиши олди олинади.
Изоҳ (0)