Буркина-Фасонинг Жибо шаҳрида “Жамоат Нусрат ал-Ислом вал-Муслимин” гуруҳи жангарилари 40 нафар тинч аҳолини ўлдирди, яна 42 нафарини яралади. Бу ҳақда “ТАСС” хабар бермоқда.
БМТ Инсон ҳуқуқлари бўйича Олий комиссари бошқармаси вакили Сейф Маганго ҳарбий ҳаракатларда иштирок этмаётган тинч аҳолига қасддан ҳужум қилиш уруш жинояти эканини таъкидлади.
“Буркина-Фасо шимолида ЖНИМ қуролли унсурлари томонидан ўнлаб тинч аҳолининг ўлдирилиши бизни шокка солди. Тинч аҳолига қарши ҳужумларни оқлаб бўлмайди ва улар тўхтатилиши керак, ҳужумга жавобгарлар ҳар томонлама, холис ва мустақил текширувдан сўнг жавобгарликка тортилиши керак”, — деди у.
Магангонинг қўшимча қилишича, жангарилар ҳарбий база, уйлар, дўконлар ва ички кўчирилганлар лагерларига ҳужум қилган.
Эслатиб ўтамиз, Буркина-Фасо 2015 йилдан буён Ғарбий Африкадаги террорчилик ҳаракатининг маркази бўлиб келган. Мамлакатда бир қанча халқаро экстремистик гуруҳлар фаолият юритади.
Ноҳукумат ташкилотларга кўра, камида 10 минг тинч аҳоли ва ҳарбий хизматчилар жангарилар томонидан ўлдирилган.
Изоҳ (0)