Ўзбекистонда тадбиркорлар ўртасида “Ёнғин хавфсизлиги аълочиси” танлови ўтказилади

Ҳукумат қарори билан “ ‘Ёнғин хавфсизлиги аълочиси’ танловини ташкил этиш ва ўтказиш тартиби тўғрисида”ги низом қабул қилинди, деб хабар беради Telegram’даги “Ҳуқуқий ахборот” канали.

Унга кўра, танлов 2024 йилдан ҳар йили октябрь—декабрь ойларида ёнғин чиқиш хавфи бўйича I ва II гуруҳга мансуб объектларга эга тадбиркорлар ўртасида навбат билан йиллар кетма-кетлигида ўтказилади (янги қурилаётган, реконструкция қилинаётган, кенгайтирилаётган, техник жиҳатдан қайта жиҳозланаётган ва капитал таъмирланаётган объектлар бундан мустасно).

Номзодларнинг аризалари танлов эълон қилинган кундан эътиборан 20 кун мобайнида Фавқулодда вазиятлар вазирлигининг махсус электрон ахборот тизими орқали туман (шаҳар) комиссиялари томонидан қабул қилинади (танловда иштирок этиш бепул).

Танловда қатнашиш истагини билдирган номзодлар ўз аризалари билан бирга қуйидагиларни тақдим этади:

• тадбиркорлик субъектлари тўғрисидаги умумий маълумот (объектнинг манзили, фаолият тури, ташкилий-ҳуқуқий шакли ва бошқалар);
• белгиланган тадбирларнинг бажарилганини тасдиқловчи ҳужжатларнинг нусхалари, фотоальбом, 5 дақиқадан ошмаган, сифати юқори бўлган видеолавҳали тақдимот материали.

Танлов 3 босқичда ташкил этилади:

• 1-босқичда танловда иштирок этиш учун муносиб номзодларни танлаб олиш мақсадида туман (шаҳар) даражасида саралаш тадбирлари ўтказилади;
• 2-босқичда Қорақалпоғистон Республикаси, вилоятлар ва Тошкент шаҳар комиссиялари туман (шаҳар) даражасида энг кўп балл тўплаган номзодлар бўйича тақдим этилган ҳужжатлар ва материалларни кўриб чиқади ва баҳолайди;
• 3-босқичда Қорақалпоғистон Республикаси, вилоятлар ва Тошкент шаҳар комиссиялари томонидан тақдим этилган номзодлар ўртасида танлов ўтказилади.  

Танловнинг якуний босқичи ҳар йили декабрь ойининг иккинчи 10 кунлигида Тошкент шаҳрида ўтказилади.

Танловда ғолиб деб топилган номзод 100 миллион сўм миқдорида бир марталик пул мукофоти билан тақдирланади ҳамда унинг фаолияти танлов натижалари расмий эълон қилинган кундан кейинги 2 йил давомида давлат ёнғин назорати органлари томонидан текширилмайди.

Бундан олдин Бухоро шаҳар Ибн Сино кўчасида жойлашган икки қаватли савдо дўконларида ёнғин содир бўлгани, Фарғонада караоке кафесида юз берган ёнғин оқибатида 6 киши ҳалок бўлгани тўғрисида хабар берилганди. 5 август куни эса Наманган вилояти Фавқулодда вазиятлар бошқармаси Чортоқ туманидаги бозорда содир бўлган ёнғин тўғрисида маълумот берди.