Қозоғистон президенти Қосим-Жўмарт Тўқаев КХШТ Коллектив хавфсизлик кенгашининг чекланган таркибдаги сессиясида иштирок этди ва унда Яқин Шарқдаги конфликтга тўхталди. Бу ҳақда Tengrinews хабар берди.
Сессияда иштирокчи давлатларнинг коллектив хавфсизлигини таъминлашнинг долзарб жиҳатлари муҳокама қилинган. Бундан ташқари, давлат раҳбарлари глобал кун тартибидаги масалалар юзасидан фикр алмашган.
Тўқаев ўз нутқида сессия халқаро вазият кескинлашиб бораётган ўзига хос мураккаб шароитда ўтаётганини айтган. Унинг фикрича, Яқин Шарқдаги ўзгаришлар алоҳида ташвиш уйғотади.
“Конфликт натижасида тинч аҳоли жабр кўрмоқда, кўплаб бегуноҳ одамлар, жумладан, болалар ҳалок бўлди. Бунга чидаб бўлмайди. Қозоғистон Ғазо аҳолисига бир миллион доллар миқдорида гуманитар ёрдам кўрсатди. Уни ходимлари орасида мисли кўрилмаган йўқотишларга учраган, аммо ўз фаолиятини қаҳрамонона давом эттираётган БМТ агентлиги – UNRWA/UNRWAга жўнатди.
Яқин Шарқдаги конфликт ҳақиқатда глобал миқёсдаги ахборот ва мафкуравий қарама-қаршилик спиралини келтириб чиқарди. Ғазо сектори атрофидаги вазият дунё ҳамжамиятини камида иккита лагерга бўлиб қўйди. Уруш олови барча мамлакатлар ва қитъаларни ёндириб юбормасдан уни тўхтатиш керак”, — деди Қозоғистон президенти.
Изоҳ (0)