Onix’нинг сотувда йўқ моделлари қимматлашди. Улар тез кунда сотила бошлаши мумкин

UzAutoMotors беш позициядаги Chevrolet Onix автомобилларининг нархларини оширди. Аммо ҳозир улар сотувда мавжуд эмас.

“Chevrolet.uz” сайтидаги янгиланган маълумотларга қараганда Onix нархлари 19 фоизгача оширилган. Хусусан, Chevrolet Onix LС МТ нархи 176,9 миллион сўм кўрсатилган. Автомобиль аввал 149 миллион сўмдан сотилган.

Сайтда Chevrolet Onix 1LT МТ нархи 180,8 миллион сўм (олдинги нарх 155 миллион сўм), Chevrolet Onix 4LT LTZ Turbo АТ нархи эса 199,9 миллион сўм (эски нарх 185 миллион сўм) кўрсатилган.

Шу билан бирга, Chevrolet Onix Premier 1 нархи 207,3 миллион сўмдан 211,9 миллион сўмгача, Chevrolet Onix Premier 2 нархи 214,7 миллион сўмдан 219,6 миллион сўмгача қимматлашган.

Ҳозирча компания сотувда йўқ мазкур моделлар нархи оширилгани бўйича расмий изоҳ бермади.

Айни пайтда Chevrolet Onix 3LT МТ 184,8 миллион сўмдан, Chevrolet Onix Premier 2 Turbo АТ Plus 221,6 миллион сўмдан, Chevrolet Onix Turbo redline 230,6 миллион сўмдан сотувда мавжуд. Компания иловасида мазкур автомобилларга навбатлар 2024 йилнинг январь ва февраль ойларида келиши кўрсатилган.

Иқтисодчи Отабек Бакиров Telegram’даги каналида нархлар оширилиши юзасидан муносабат билдирди.

“Монополист UzAutoMotors автомобиллар позициялар нархини бу ҳақда расмий хабар бермасдан туриб ошириш йўлини тутганга ўхшайди. Ваколатсиз, бунинг устига раҳбарсиз қолган Рақобат қўмитаси монополистнинг ўзбекистонликлар устидан ўтказишни бошлаган мазкур тажрибасига бирон бир муносабат билдиргани йўқ. Истеъмолчилар нархлар ошганини олдинги ва компания сайтидаги жорий нархларни солиштирибгина билишларига тўғри келмоқда. Таъкидлаш лозимки, саналган позицияларнинг биронтаси очиқ сотувда йўқ (алоҳида келишиб, топса бўлади)”, — дея фикр билдирган иқтисодчи.

Отабек Бакировнинг ёзишича, нархлар оширилганига қараганда тез кунда сотувлар бошланиши ҳам мумкин.

“Октябрда Chevrolet Onix 3LT МТ позициясининг нархи 26 миллион сўмга оширилгач, 184,8 миллион сўм нарх билан контактациялар очилганди (2024 йил июнга шартнома тузиш мумкин). Эҳтимолки, нархлари ошган позициялар эртадан сотувда пайдо бўлиб қолиши мумкин. Эсда тутингки, энди Lacetti’дан арзон Onix расман йўқ. Тажрибахонага айлантирилган, бозор дейишга тил бормайдиган танловсиз муҳитимизни Қозоғистон билан солиштиринг. Қардош қўшниларда ўзимизнинг Chevrolet Onix 0 фоиз бадал билан 7 йилга бўлиб тўлашга берилмоқда”, — деб ёзган у.

Жорий йилнинг 26 майида эълон қилинган мақоламизда Onix Premier 1 ва Premier 2 сотуви бошлангани, ўшанда мазкур русумдаги автомобиллар учун 1 минг 171 та навбат мавжудлиги ва машина тайёр бўлишини 1 йил кутиш кераклиги келтирилган.

Маълумотларга кўра, 2023 йилда жами 80 минг дона Onix автомобили ишлаб чиқариш режалаштирилган. Статистика агенлиги хабари беришича, UzAutoMotors жорий йилнинг 9 ойи давомида 22 082 та Onix автомобили ишлаб чиқарган. 

Эслатиб ўтамиз, компания Tracker ва Onix 2023 йилдан Spark ва Nexia ўрнига ишлаб чиқарилишини маълум қилган. Onix биринчи марта сотувга чиққан 2022 йил 1 ноябрь куни автомобиль учун рекорд даражадаги — 28 мингдан ортиқ шартнома имзоланган ва навбатлар бир йилгача чўзилганди. Дастлаб Onix 9-12 минг доллар атрофида сотилиши хабар қилинган. Аммо жорий йилнинг май ойи бошида шартномалар тўхтатилгунга қадар автомобиль 18 минг доллардан сотилган.