Исроил кучлари Ғазо сектори шимолидаги Ал-Қудс касалхонасини қуршаб олди. Бу ҳақда Фаластин Қизил ярим ой жамиятига таяниб, “ТАСС” хабар берди.
Маълумотларига кўра, “Исроил аскарлари ва танклари касалхонани ҳар томондан қуршаб олган”. Тиббиёт муассасаси беморлар ва уларнинг оила аъзолари ҳамда ходимларни эвакуация қилишга ҳозирлик кўрмоқда. Шифокорлар беморлар, жумладан, янги туғилган чақалоқлар ёнилғи етишмаслиги туфайли вафот этаётганини айтди.
Ал-Қудс шифохонаси ёнилғи ва электр қуввати йўқлиги сабабли ўз фаолиятини тўхтатган.
8 ноябрь куни араб ОАВлари Исроил шифохонага ҳужум қилгани ҳақида хабар берди. Исроил ҳарбийлари зарбалар касалхонага туташ бинода жойлашган Фаластиннинг ҲАМАС ҳаракати жангчиларига қарши уюштирилганини ва бу “иккинчи даражали портлашлар”га олиб келганини даъво қилди. Исроил бир неча бор ҲАМАС тарафдорларини ўз инфратузилмаларини фуқаролик объектлари яқинида, шунингдек, улар остидаги туннелларда жойлаштирганликда айблаган.
7 октябрдан буён Ғазога берилган зарбалар оқибатида ҳалок бўлганлар сони 11 минг кишидан ошди, уларнинг тўрт мингдан ортиғи болалардир. Бундан ташқари, техникалар етишмаслиги сабабли вайроналар остидан жароҳатланганларни олиб чиқиш имконияти йўқ. Ўз навбатида, бу ҳалок бўлганлар сонининг ортишига сабаб бўлиши мумкин.
Изоҳ (0)