Фаластин президенти Маҳмуд Аббос АҚШ давлат котиби Энтони Блинкенга Иордан денгизининг ғарбий соҳили ва Шарқий Қуддусдаги вазиятни тартибга солувчи кенг қамровли сиёсий ечим доирасида Ғазо сектори Фаластин давлати назоратига ўтиши мумкинлигини маълум қилди. Бу ҳақда мамлакатнинг WAFA агентлиги хабар берди.
“Биз Иордан денгизининг бутун Ғарбий соҳили, шу жумладан, Шарқий Қуддус ва Ғазо секторини ўз ичига олган кенг қамровли сиёсий ечимнинг бир қисми сифатида ўз масъулиятимизни тўлиқ бажарамиз”, — дейди Аббос. Шунингдек, у Ғазо сектори Фаластиннинг ажралмас қисми эканини таъкидлаган.
Энтони Блинкен 5 ноябрь куни Иордан денгизининг Ғарбий соҳилига ташриф буюриб, Фаластин президенти билан учрашганди. Reutersънинг АҚШ Давлат департаментидаги манбаларига кўра, томонлар ҲАМАС ҳаракати йўқ қилинганидан кейин Ғазо секторининг келажагини муҳокама қилган.
1 ноябрь куни Блинкен Фаластин миллий маъмурияти Ғазо сектори учун энг яхши вариант эканини маълум қилганди. Унинг айтишича, айнан ушбу тузилма Исроил ва ҲАМАС ўртасидаги жанговар ҳаракатлар якунлангач, анклав ҳудудни назорат қилиши керак.
Изоҳ (0)