Ўзбекистонда 2024 йилда асосий солиқ ставкалари ўзгаришсиз қолдирилади. Бу ҳақда 1 ноябрь куни Тошкент шаҳрида бўлиб ўтган матбуот анжуманида Иқтисодиёт ва молия вазири ўринбосари Аҳадбек Ҳайдаров маълум қилди, дея хабар берди “Дарё” мухбири.
Аҳадбек Ҳайдаровнинг таъкидлашича, “Янги Ўзбекистон 2030” стратегиясига мувофиқ, 2024 йилда асосий солиқ ставкалари ўзгаришсиз қолдирилади. Хусусан:
- фойда солиғининг базавий ставкаси 15 фоиз;
- жисмоний шахслардан олинадиган даромад солиғи 12 фоиз;
- ижтимоий солиқ 12 фоиз;
- қўшилган қиймат солиғи 12 фоиз;
- айланмадан олинадиган солиқнинг базавий ставкаси 4 фоиз;
- юридик шахсларнинг мол-мулкига солинган солиқ ставкаси 1,5 фоиз миқдорида сақлаб қолинади.
“Ер қаридан фойдаланганлик учун цемент ишлаб чиқаришга мўлжалланган оҳактош бўйича белгиланган ставка икки баравар, яъни солиқ ставкасини хом ашёнинг бир тоннаси учун 22 минг 500 сўмдан 11 минг 200 сўмгача пасайтириш кўзда тутилмоқда”, — деди вазир ўринбосари.
2024 йил 1 апрелдан таркибида шакар мавжуд бўлган газланган ичимликларнинг 1 литри учун 500 сўм миқдорида акциз солиғи солиш таклиф қилинмоқда. Ушбу акциз солиғидан тушган маблағлар тўлиқлигича Тиббиётни ривожлантириш жамғармасига йўналтирилади.
“2024 йил 1 июлдан бошлаб автомобиль шиналарининг 1 донаси вазнидан келиб чиқиб, БҲМнинг 0,3 фоиз миқдорида утилизация йиғимини жорий этиш таклиф қилинмоқда. Жумладан, енгил автомобилнинг битта шинасига 6 минг сўмдан 16 минг сўмгача, юк автомобили шинасига 11 минг сўмдан 58 сўмгача солиқ солинади”,—деди Аҳадбек Ҳайдаров.
2024 йил 1 ноябрдан сигареталар ва бошқа тамаки маҳсулотлари ишлаб чиқариш учун акциз солиғи 12 фоиз миқдорида индексация қилинади. Сигареталар импортига акциз солиғи ставкаларини 5 фоизга пасайтириш таклиф қилинмоқда. Бунда Жаҳон савдо ташкилоти талабларида акциз солиғи ставкалари маҳаллий ва импорт қилинадиган маҳсулотлар учун бир хил бўлиши лозимлиги инобатга олиняпти.
“2024 йил 1 апрелдан бошлаб нефть маҳсулотлари учун амалдаги акциз солиқ ставкалари 12 фоиз индексация қилиш кўзда тутилмоқда. Аи-91 ва ундан юқори октанли бензинларга акциз солиқ ставкалари ўзгартирилмайди”,—деди вазир ўринбосари.
Аҳадбек Ҳайдаров нутқи давомида 2024 йил 1 апрелидан Ўзбекистон ҳудудида хизмат кўрсатадиган хорижлик жисмоний шахсларни ҚҚСга тортиш таклиф қилинаётганига тўхталди.
“Маҳаллий якка тартибдаги тадбиркорлар хизмат кўрсатганда ҚҚС тўламоқда. Лекин ҳудди шу хизматларни чет эллик тадбиркорлар кўрсаца, улар ҚҚСга тортилмасдан қолмоқда. Янги тартибнинг жорий этилиши натижасида маҳаллий ва якка тартибдаги тадбиркорлар учун бир хил шароит яратиш имконияти яратилади”,—деди вазирлик масъули.
Шунингдек, келаси йилнинг 1 январидан бошлаб айланмадан олинадиган солиқнинг қатъий белгиланган суммадаги ставкасини солиқ тўловчининг товар айланмаси 500 миллион сўмгача бўлганда 25 миллион сўм, ундан юқори бўлганда 34 миллион сўм этиб белгилаш таклиф қилинмоқда.
“Амалдаги қонунчиликка мувофиқ, қатъий белгиланган ставкаларда солиқ тўлайдиганлар солиқ идораларига ҳисобот топширишда солиқ текширувларидан дивиденд тўлашда ушлаб қолинадиган 5 фоизли солиқдан озод қилинади. Бунда тадбиркорларда ўзига қулай ва афзаллигига қараб, таклиф этилаётган қатъий ёки айланмадан 4 фоиз солиқ тўлашни танлаш ҳуқуқи сақлаб қолинади”,—деди Аҳадбек Ҳайдаров.
Изоҳ (0)