“Бухоро”—“Пахтакор” ўйинида пенальти нотўғри белгиланган деб топилди, учрашувда ишлаган икки нафар ҳакам номаълум муддатга четлатилди

Футбол бўйича Ўзбекистон Суперлигасининг 23-турида “Пахтакор” “Бухоро”га қарши баҳс (1:0) олиб борди.

Учрашувнинг 90+5-дақиқасида юзага келган баҳсли вазиятдан сўнг учрашув ВАР ҳакамлари бош ҳакам Равшан Абдувоҳидовни монитор ёнига чақирди ва такрорларни кўриб чиқишга чорлади. Шундан сўнг бош ҳакам 11 метрли жарима зарбаси белгилади. Драган Черан пенальтини ноаниқ амалга оширди ва қайтган тўп яна унинг ўзига тушди. Натижада Черан дарвозани ишғол қилди. 

Ўйин тақдирини ҳал қилган ушбу вазият бўйича Эксперт-ҳакамлар комиссиясининг фавқулотда йиғилиши ташкил қилинди ва мутахассисларнинг умумий хулосаси олинди. 

Мазкур вазиятда видео ассистентлар бош ҳакамни ВАР протоколига кўра нотўғри чақирди. Аслида бундай вазиятга ВАР аралашиши керак эмасди. Бундан ташқари, видеотакрорларда қоидабузарликни аниқ қайд этиш учун етарли далиллар бўлмагани боис, экспертлар бир овоздан пенальтининг ҳам нотўғри белгиланганини қайд этишди.

Натижада, бош ҳакам Равшан Абдувоҳидов ва ВАР ҳаками Найим Қосимовнинг ВАР лицензиялари қайтариб олинди. Уларнинг иши ЎФА футбол фаолиятини назорат қилиш бўйича махсус инспекциясига оширилди. Шунингдек, иккала ҳакам ҳам номуайян муддатга ҳакамликдан четлатилди.

Эксперт-ҳакамлар комиссияси баёноти