Тошкент вилояти Экология бошқармаси ҳамда Сирдарё сув ҳавзаси шўбаси давлат инспекторлари томонидан Чиноз тумани “Аҳиллик” МФЙ ҳудудидан оқиб ўтувчи Чирчиқ дарёси бўйида тунги назорат рейд тадбири ўтказилди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати хабар берди.
Қайд этилишича, тадбир давомида тунги соат 03:00 атрофида Янгийўл тумани “Ниёзбоши” МФЙ, Зарғалдоқ кўчасида яшовчи 32 ёшли фуқаро Х.Ш. ҳамда шу ҳудудда яшовчи 43 ёшли фуқаро Б.Ш. ноқонуний балиқ овлаётгани аниқланган.
Ҳолат ўрганилганида, ҳуқуқбузарлар 7 бош зоғора балиқ, 4 бош оқ балиқ ва 1 бош товон балиқ, жами 12 бош балиқ овлагани маълум бўлган.
Ҳолат юзасидан ҳайвонот дунёсига 7 миллион 600 минг сўм миқдорида зарар етказилгани аниқланиб, ҳуқуқбузарга нисбатан Маъмурий жавобгарлик тўғрисидаги кодекснинг тегишли моддаларига асосан маъмурий байёнома расмийлаштирилди.
Ҳужжатлар ҳолатга ҳуқуқий баҳо бериш учун жиноят ишлари бўйича Чиноз туман судига юборилган.
- Бундан олдин Жиззах вилоятида 541 та балиқ ноқонуний овланиб, табиатга 178 миллион 530 минг сўм зарар етказилгани аниқланганди.
- Ушбу ҳудудда апрель ойида ўтказилган рейд давомида электр қармоқлардан фойдаланган ҳолда ноқонуний балиқ овлаётганлар ушланган эди. Ўшанда фуқаролардан бири хизмат вазифасини бажараётган ходимларнинг қонуний талабларини бажармасдан, уларга фаол қаршилик кўрсатиб, ноқонуний овлаган балиқлари ва бошқа ашёвий далилларни йўқ қилиш мақсадида ўзининг Nexia-3 ни департамент бўлим бошлиғи устига ҳайдаб, унинг ҳаёти ва соғлиғига хавф туғдириш орқали тан жароҳати етказганди.
Изоҳ (0)