Тошкент вилоятининг Янгийўл тумани ҳокими Одилжон Атауллаев маҳаллаларда фаолият юритувчи 6 нафар ёрдамчисини жазолади. Бу ҳақда “Дарё”га ҳокимлик ахборот хизмати раҳбари Райҳон Муродова хабар берди.
Ҳоким ёрдамчиларининг жазоланишига, уларнинг 2023 йилнинг учинчи чораги якунида KПИ (энг муҳим самарадорлик кўрсаткичлари) бўйича туманда паст кўрсаткични қайд этгани сабаб бўлган.
Ҳоким ёрдамчиларининг жазоланишига Ўзбекистон Республикаси президентининг 2021 йил 3 декабрдаги “Маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчилари фаолиятини ташкил этиш чора-тадбирлари тўғрисида”ги қарори ижросини таъминламаганлигини ҳамда туман Камбағалликни қисқартириш ва бандликка кўмаклашиш бўлими бошлиғининг 2023 йил 16 октябрь кунидаги билдиргиси сабаб бўлган, — дейди ҳокимлик масъули.
Хизмат вазифаларини талаб даражасида бажармаган ҳамда иш фаолиятига нисбатан масъулиятсизлик билан ёндашган “Ғалаба” маҳалласидаги ҳоким ёрдамчиси Аҳрор Рустамов, “Эпкенди”даги Қурбонали Ўразов, “Бунёдкор”даги Бахтиёр Неъматов, “Янгийўл” маҳалласидаги Бахтиёр Раҳимбердиев, “Ватан” маҳалласидаги Шерали Ғаппоров ҳамда “Халқобод”даги Равшан Рихсибоевлар ўртача ойлик иш ҳақининг 30 фоиз миқдорида жаримага тортилган.
Изоҳ (0)