Тошкент вилоятининг Оққўрғон туманида 15 октябрь — Халқаро қишлоқ аёллари куни муносабати билан тадбир бўлиб ўтди. Унда Зоир Мирзаевнинг ўринбосари — Оила ва хотин-қизлар бошқармаси бошлиғи Зуҳра Мирғозиева, Оққўрғон тумани ҳокими Тўра Боболов иштирок этди.
Тадбирда иштирокчилар дастлаб “Бойғули” маҳалла фуқаролар йиғинидаги ибратли оилалар ҳаёти билан танишди.
Қишлоқ аёллари қўл меҳнати билан тайёрланган ҳунармандчилик маҳсулотлари намойиш этилди.
Таъкидланишича, бу ҳудуддаги аҳоли томорқасида чорвачилик ва асаларичилик билан шуғулланиб, даромад орттиради.
Тошкент вилояти ҳокимлиги ахборот хизматининг маълумот беришича, Тошкент вилоятидаги 1 миллион 488 минг 903 нафар хотин-қизнинг 75,3 фоизи олис ва чекка ҳудудларда яшайди. Ўтган даврда қишлоқ жойларидаги 44 минг нафар ишсиз хотин-қизнинг 13 минг нафари доимий ишга қабул қилинган, 25 минг нафари касб-ҳунарга ўқитилиб, ўзини-ўзи банд қилган.
Вилоятда хотин-қизлар тадбиркорлигини ривожлантириш учун 2023 йилнинг 9 ойи давомида 12 минг 857 нафар аёлга кредит маблағлари ажратилган. “Аёллар дафтари”га киритилган 79 минг 528 нафар хотин-қизга амалий ёрдам кўрсатилган. Жумладан, 30 минг 394 нафар ишсиз хотин-қизнинг бандлиги таъминланиб, 3 минг 461 нафари касб-ҳунарга ўқитилди, — дейди Оила ва хотин-қизлар бошқармаси бошлиғи Зуҳра Мирғозиева.
Изоҳ (0)