Ўзбекистон ҳукумати делегациясининг Чехияга расмий ташрифи доирасида ушбу мамлакат президенти Пётр Павел билан ҳам учрашув ўтказилди. Бу ҳақда ҳукумат портали хабар берди.
Қабулда дастлаб, Чехия президенти Пётр Павел Шавкат Мирзиёевнинг мамлакатда олиб бораётган ислоҳотлари ва очиқ ташқи сиёсатларини олқишлади ҳамда Ўзбекистон президентига самимий саломини етказиб қўйишни сўради. Ўз навбатида, бош вазир Абдулла Арипов Чехия президентига Шавкат Мирзиёевнинг ҳам саломи ва эзгу тилакларини етказди.
Учрашувда савдо-иқтисодий, энергетика, транспорт, туризм, қишлоқ хўжалиги, маданий-гуманитар, туризм, олий таълим ва илмий-тадқиқот муассасалари ўртасидаги ҳамкорликни ривожлантириш истиқболлари кўриб чиқилди.
Ўзбекистон ҳукумати делегациясининг Чехияга расмий ташрифи доирасида ушбу мамлакатнинг “Шкода”, “Омнипол”, “Кристал Богемия”, “Примако” ва бошқа етакчи фирма ва компаниялари вакиллари билан тегишли йўналишлар бўйича ҳамкорлик алоқаларини кенгайтиришга қаратилган икки томонлама учрашув ва музокаралар ўтказилди. Юқори технологияли ишлаб чиқариш жараёнлари билан танишиш мақсадида бир қатор корхоналарга ташриф буюрилди.
Чехияга ташриф якунлари бўйича умумий қиймати 800 миллион евродан зиёд инвестиция битимлари ва савдо шартномалари имзоланди.
Аввалроқ расмий ташриф билан Чехияда бўлиб турган Ўзбекистон бош вазири Абдулла Арипов Страка академиясида Чехия бош вазири Петр Фиала билан учрашув ўтказганди. Томонлар иккита Л-410 самолётини етказиб бериш бўйича шартнома тузишга муваффақ бўлган, “Ўзбекистон ҳаво йўллари” яқинда уларни қабул қилиб олди.
Изоҳ (0)