2022 йил қиш якунида Россия ва Грузия чегарасида 160 километргача узунликдаги автомобиллар тирбандлиги юзага келган. Унда ўзбек юк автомобиллари ҳайдовчилари ҳам бўлган. Бу ҳақда Ўзбекистон халқаро автомобилда ташувчилар уюшмаси раиси Санжар Пўлатов “Дарё”га берган интервьюсида айтди.
.jpg)
Санжар Пўлатовнинг таъкидлашича, тирбандликда қолиб кетган ўзбекистонлик ҳайдовчиларга элчихона томонидан ёрдам кўрсатилган.
“Ҳайдовчиларимиз ҳақиқий қаҳрамон. Сабаби йўлда жуда кўп қийинчиликлар, муаммолар бўлишига қарамасдан улар ўз касбини севиб давом эттиришади. Айниқса, ҳаво ҳарорати жуда совуқ бўладиган ҳудудлардаги музламаларда қолиб, навбатларда 10-15 кунлаб кутиб ишлаш осон эмас. Масалан, Украина воқеаси (Россия–Украина уруши) бошланганда (2022 йил, февраль) “Верхний Ларс”, яъни Россия билан Грузия чегара пунктида катта–катта тирбандликлар юзага келган. Тирбандликнинг узунлиги 160 километргача етиб, Чеченистон томонларгача борганди. Оқибатда ҳайдовчилар ўша ҳудудда бир ойгача қолиб кетди. Бу жараёнда Россиядаги элчихонамиз вакиллари бориб, ўзимизнинг ҳайдовчилар ҳолидан хабар олиб туришди. Уларга керакли озиқ-овқат ва бошқа масалаларда ёрдам берилди”,—деди у.
Суҳбат давомида Санжар Пўлатов Украинага Россия ҳужуми бошланган пайтда уруш кетаётган ҳудудда 100 нафардан ортиқ ўзбекистонлик ҳайдовчилар қолиб кетгани ҳақида гапирди.
“Беш нафар ҳайдовчимиз Мариуполда қолиб кетганди. Уларни ватанга олиб келиш учун ҳукумат комиссияси тузилди. Бизга Россия ва Украина элчихоналари, Халқаро автотранспорт иттифоқи ёрдам берди. Ҳайдовчиларимиз Ўзбекистонга жуда қийинчилик билан олиб келинди. Уларга маршрутлар чизиб берилган ва шу орқали Украина ҳудудидан чиқиб кетишган. Мариуполда қийин бўлган. Элчихоналаримиз роса ишлашган. Масъуллар: “имкони бўлса, самолёт қўйиб берардик, лекин иложи йўқда”, дейишган. Тўрт нафар одам учун самолёт қўйиб беришга ҳам тайёр бўлишган. Бироқ у пайтда Мариупол бутунлай блокадада эди. Жуда қийналганмиз. Аммо эсон–омон чиқишди. Шунинг учун ҳам мен уларни қаҳрамон дейман”, — деди мутахассис.
Аввалроқ Тошкент шаҳрида “Халқаро автомобиль транспорти: барқарор ривожланиш ва фаровонлик сари” мавзусида халқаро анжуман ўтказилгани хабар қилинганди. Тадбирда ҳозирги кунда Ўзбекистоннинг экспорт–импорт юкларининг 68 фоизини миллий ташувчилар ташиётгани, илгари бу кўрсаткич 30 фоизга ҳам етмагани айтилган. Шу билан бирга, Ўзбекистонда 5–7 минг нафар юк автомобиллари ҳайдайдиган юқори малакали ҳайдовчига эҳтиёж борлиги таъкидланган.
Изоҳ (0)