Ўзбекистон мобил интернет нархининг арзонлиги бўйича 238 та давлат ичида 22-ўринни эгаллади. Бу ҳақда Cable хабар бермоқда.
Ўтган йилда мамлакат 1 Гб учун ўртача 0,37 доллар нарх билан 15-ўринни эгаллаганди. Ўзбекистонда 1 Гб интернет нархи ўртача 0,30 доллар бўлиб, МДҲ мамлакатлари орасида интернет арзонлиги бўйича 2-ўринни эгаллайди.
Марказий Осиё ва МДҲдаги энг арзон нарх Қирғизистонда — 1 Гб учун 0,17 доллар. Мамлакат ўтган йилги даражасидан икки поғонага тушиб, 8-ўринни эгаллади.
Қозоғистон эса 0,41 доллар кўрсаткич билан 35-ўринни банд этган. Тожикистонда 1 Гб интернет нархи ўртача 1,65 доллар бўлиб, у жаҳонда 142-ўринда туради. Марказий Осиёда энг қиммат интернет эса Туркманистонда — 1 Гб учун 11,42 доллар. Мамлакат дунё бўйича 231-ўринни эгаллаган.
Энг арзон мобил интернет Исроилда — 1 Гб учун 0,02 доллар. Кейинги ўринларда Италия (0,09 доллар), Физи (0,09 доллар), Сан-Марино (0,10 доллар) ва Камбожа (0,12 доллар) жой олган.
Энг қиммат мобил интернет эса Зимбабве (43,75 доллар), Фолкленд ороллари (40,58 доллар) ва Муқаддас Елена оролларига (40,13 доллар) тегишли.
Ўзбекистонда интернет тезлиги
2022 йил декабрда рақамли технологиялар вазири Шерзод Шерматов Ўзбекистон аҳолисининг интернет хизматидан фойдаланувчилари сони 31 миллиондан ортганини маълум қилганди. Вазирнинг қайд этишича, халқаро ва шаҳарлараро телекоммуникация тармоғини ривожлантириш мақсадида халқаро интернет тармоғига уланишнинг умумий ўтказувчанлик қобилияти 2,6 баробар оширилиб, 3 200 Гбит/секундга етказилган.
Республика 2022 йилда дунёдаги симли интернет тезлиги бўйича рейтингда 155-ўринда бўлган. 2023 йилда эса натижалар ўзгариб, 131-ўринга кўтарилган. Яъни ўтган йилги рейтингга нисбатан 24 поғонага ўсиш бўлган. Ўзбекистондаги симли интернет тезлиги 21,67 Мбит/с экани қайд этилган.
Шунингдек, Ўзбекистонда 2023 йил март ойидан бошлаб мобил интернет тезлиги оширилиши ва мамлакат бўйлаб 5G технологияси жорий этилиши тўғрисида хабар берилган эди.
Изоҳ (0)