Ўзбекистонда барқарор ривожланиш маданиятини илгари суриш ҳамда болалар ва ёшларни иқлим кун тартибига жалб қилиш бўйича миллий стратегия ҳамда “йўл харитаси” имзоланди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги хабар берди.
Миллий стратегия ташаббуси эко-фаоллар, шу жумладан, имзолаш маросимида иштирок этган Эcо-schools Uzbekistan лойиҳаси аъзолари томонидан илгари сурилган. Эко-фаоллар стратегияни ЮНИСЕФ ва ЮНЕСКО халқаро экспертлари кўмагида GEP тавсияларини ҳисобга олган ҳолда ишлаб чиқиш жараёнининг тенг ҳуқуқли иштирокчиси бўлди.
Стратегия болалар ва ёшларнинг иқлим ўзгаришига қарши курашишдаги ролини эътироф этиш, уларнинг соҳадаги фаол иштирокини таъминлаш, шу жумладан, ўқув жараёнида асосий эътиборни билим беришдаги муаммоларни ўрганиш ва ечимларни излашга йўналтиришни назарда тутади.
Стратегия “яшил” таълим ва барқарор ривожланиш тизимини изчил шакллантириш учун таянч ҳужжат бўлиб хизмат қилиши лозим. Унда сифатли экологик таълимнинг асосий тамойиллари қайд этилган: узлуксизлик, фанлараро боғлиқлик, фундаменталлик ва комплекслик.
Ёшлар стратегиясининг асосий вазифалари қуйидагилар:
- “яшил” таълимни илгари суриш бўйича миллий сиёсат ва ҳаракатлар режасини ишлаб чиқиш ҳамда зарур ўқув ресурсларини яратиш;
- болалар ва ёшларнинг иқлим ўзгаришига қарши курашдаги саъй-ҳаракатларини қўллаб-қувватлаш ва фаоллаштириш учун турли манфаатдор томонлар ўртасида шериклик муносабатлари ва ҳамкорликни ривожлантириш ҳамда авлодлар ўртасидаги ҳамкорликнинг муҳим ролини эътироф этиш;
- мактабгача ва мактаб таълими муассасаларида “яшил” ҳамжамиятни яратиш.
Бундан олдин Ўзбекистондаги 4 та вилоятда ёшларнинг экология ва фермерлик борасидаги билимларини оширувчи махсус ўқув марказ ташкил этилиши, мамлакатда экологик аудиторга малака сертификати бериш бўйича давлат хизматлари кўрсатилиши тўғрисида хабар берилганди.
Изоҳ (0)