Собиқ актриса Камола Арслонова “Дарё”нинг YouTube даги каналига берган интервьюсида “Опа-сингиллар” сериалига таклиф этилиши ва қизини ўзбек йигитига турмушга беришни истамаслиги ҳақида айтиб ўтди.
— “Опа-сингиллар” сериалида актёрлар кастинг асосида таклиф этилгани ҳақида эшитганман. Режиссёр Замира Бегимқулова юзлаб қизлар орасида ролга мосларини танлаб олган экан. Аммо мен ҳеч қандай кастингсиз ролга таклиф этилганман. Замира Бегимқулованинг олдига борганман ва бир неча дақиқа суҳбатлашганмиз. Бир неча кундан кейин ролга тасдиқланганимни айтишган. Кейин билсам режиссёр сериалдаги опа-сингилларни нафақат маҳоратига, балки бир-бирига ўхшаш қиёфада эканига ҳам аҳамият берган экан.
Сериал суратга олинганига 10 йилдан ошди, аммо ҳалигача одамлар яхши хотиралар билан эслашади. Ҳатто, уни қайта-қайта томоша қилишаётгани ҳақида айтишади. Ҳозирги сериалларга қараганда, анча савияли экани ҳақида атишса қувониб кетаман. Аёл боши билан катта жамоани бошқариш Замира Бегимқуловага осон кечмаган. Қисқа вақт ичида ҳаммамиз бир оиладек бир-биримизга яқин бўлиб кетгандик. Раҳматли Гавҳар Шарипова билан ҳам сёмка майдончасида яқин бўлиб кетгандик. Ҳаётидан кўп нолирди. Кимдир бунга эътибор берар, кимлардир эшитишни ҳам истамасди. Табиатан дардкаш инсон бўлганим учун Гавҳар опага эътиборсиз эмасдим. У билан шунчалик яқин бўлиб кетгандикки, турмушга чиқиб кетганимдан кейин ҳам хабарлашиб турардик. Бир куни турмуш ўртоғимга Гавҳар опанинг суратини кўрсатсам, “Ҳаётда қийналган аёл экан”, деди. Чунки инсоннинг ичидаги дарди кўзларида намоён бўлар экан. Ўшанда уни Туркияга чақириб, ўз ўрнини топишига кўмаклашиш ҳақида ҳам ўйлагандик. Аммо яхшилик қиламан, деб ёмонлик қилиб қўйишдан қўрққаним учун Гавҳар опага индамай қўйгандим. Аммо ўлими ҳақидаги хабарни ўқиб, “Эссиз ўша пайтда нега Туркияга чақирмадим. Ўлими ҳақида эшитганимда, балки бу ерда яшаганда бундай бўлмасмиди, деб ўйладим. Аммо пешонага битилган тақдирдан қочиб қутилиб бўлмайди. Жуда яхши, дилбар аёл эди, — дейди Камола Арслонова.
Турк оиласига келин бўлган собиқ актриса Instagram тармоғига “Туркни келин, ўзбек йигитини эса куёв қилмайман”, деган видеоси кўплаб муҳокамаларга сабаб бўлганди. У нега бундай видео жойлаганини қуйидагича изоҳлади.
— Меҳнаткашлик, одоб-ахлоқ борасида ўзбек қизларига тенг келадигани йўқ. Қайнонам ҳам бир неча видеоларимда “Энг яхши келиним сенсан”, деб айтиб ўтган. Фақатгина овсинларим ранжиб қолишларини истамай, уларни тармоққа жойламаганман. Назаримда ўзбек келинлари эшитишни ва “ҳўп бўлади” дейишни билишади. Фақат ўзбек қизлари ўз қадрини билишни ва ўзларини севишни ўрганишлари керак. Туркияда яшасам ҳам барибир Ўзбекистонни яхши кўраман. Афсуски, оиламни ташлаб тез-тез бу ерга келиш имконим йўқ. Тўрт йил деганда ота уйимга келолдим. Қизиғи шундаки, фарзандларимга, хусусан, қизимга Ўзбекистон бегона, унинг ватани Туркия. У ҳам мендек Ватан соғинчи билан яшашини истамайман. Онам “Ёшликда тезроқ фарзандларингни кўпайтириб ол”, деб кўп айтади. Яқинда ҳам шу мавзу кўтарилганида “Она сизнинг тўртта фарзандингиз бор, аммо уларнинг ҳеч бир ёнингизда эмас-ку”, деб айтиб юборибман. Тақдир тақозоси билан мен ва синглим Туркияда, опам Қозоғистонда, укам эса Россияда яшаяпти. Катта ҳовлида эса онам ёлғиз. Тўғри ёнида бошқа яқинларимиз бор, аммо уларнинг ҳеч бири фарзандларнинг ўрнини босолмайди. Укам Россияда тиббиёт соҳаси бўйича ўқийди. Синглим ҳам мен каби турк йигити билан оила қурган. Опам эса турмуш ўртоғининг иши сабаб, оиласи билан Қозоғистонда яшайди. Ҳеч биримиз хорижда яшашни орзу қилмаганмиз, начора тақдиримизга шу ёзилган экан, — дейди собиқ актриса Камола Арслонова.
Изоҳ (0)