“Тошшаҳартрансхизмат” АЖ автобус ҳайдовчиси ва йўловчилар ўртасида содир бўлган тортишув юзасидан муносабат билдирди.
Ижтимоий тармоқларда автобус ҳайдовчиси ва йўловчилар ўзаро тортишаётгани акс этган видео тарқалди. Ҳолат “Тошшаҳартрансхизмат” томонидан атрофлича, автобус салонига ўрнатилган видеокузатув воситаларида қайд этилган тасвирлар асосида ўрганиб чиқилган.
Ўрганиш жараёнида 25 сентябрь куни соат 19:59 да 93-сонли автобус йўналиши ҳайдовчиси А.Ғ. бошқарувида Юнусобод 9-даҳасидан Food city савдо маркази томон ҳаракатланиб кетаётган King Long русумли автобусда содир бўлгани аниқланган.
Маълум бўлишича, салондаги йўловчига ҳайдовчи томонидан белгиланмаган жойда автобусни тўхтатмаслиги тўғрисида маълумот берилган. Шундан сўнг йўловчи ҳақоратли сўзларни гапириб, автобус бошқарувига халақит берган. Тортишув натижасида йўловчи ва унга ҳамроҳлик қилаётган аёл йўловчи автобусдан тушиб, унинг олд томонига туриб олиб 15 дақиқа давомида ҳаракатланишига тўсқинлик қилган. Ҳозирда воқеа юзасидан қўшимча ўрганиш ишлари олиб борилмоқда.
“Ҳурматли йўловчилар! Жамоат транспортида ҳаракатланиш қоидаларига амал қилишингизни ва юқоридаги каби ҳолатларга гувоҳ бўлганингизда 1062 ишонч рақамига мурожаат қилишингизни илтимос қиламиз”, — дейилади хабарда.
Июнь ойида Тошкент шаҳрида кондиционерни ёқмасдан ҳаракатланган автобус ҳайдовчисига жазо чораси белгилангани, ундан олдин эса йўловчи электробуси ҳайдовчиси қувиб ўтиш қоидасини бузиб, йўловчилар ҳаётини хавфга қўйгани, Тошкентда автобус ҳайдовчиси ҳаракат давомида сигарет чеккани тўғрисида хабар берилганди.
Изоҳ (0)