Россиянинг Владивосток шаҳрида вояга етмаган фарзандлари билан оғир аҳволга тушиб қолган аёл Тошкентга қайтарилди. Бу ҳақда “Дунё” агентлиги хабар берди.

Қайд этилишича, Ўзбекистон фуқароси бўлган Н.Н. вояга етмаган икки нафар фарзанди билан Владивосток шаҳрида молиявий жиҳатдан мушкул аҳволга тушиб қолгани боис амалий кўмак сўраб Бош консулликка мурожаат қилган.

Унинг мурожаати атрофлича ўрганиб чиқилганда, фуқаро 2023 йил июнь оийда ишлаш учун Россиянинг Приморск ўлкасига фарзандлари билан келгани маълум бўлган. Август ойида оилавий жанжал чоғида олинган тан жароҳати туфайли у Владивосток шаҳридаги 2-клиник шифохонасининг жонлантириш бўлимида даволанган. Вояга етмаган фарзандлари Владивосток шаҳридаги Приморск ўлка психоневрологик болалар уйига вақтинча жойлаштирилган.

Сўнгра Н.Н. уй шароитида даволаниб келган, ишлашнинг имконияти бўлмагани боис тиббиёт муолажаларини қоплашда жиддий моддий қийинчиликларга рўпара бўлган.

Аёлнинг аризасига мувофиқ, Бош консуллик мезбон давлатнинг тегишли ташкилотлари билан музокаралар олиб боргани натижасида фарзандлари онасига олиб берилган, шунингдек, “Меҳр” лойиҳаси жамғармасидан Ўзбекистонга қайтишлари учун она-болаларга Владивосток—Тошкент йўналиши бўйича ҳаво қатновига чипта харид қилинган. Сўнгра улар Ўзбекистонга кузатиб қўйилган.

Бундан олдин Россияга ишлаш учун бориб, вафот этган аёлнинг 9 ёшли қизи Ўзбекистонга қайтарилгани тўғрисида хабар берилганди. Шунингдек, Мисрда автоҳалокатга учраб, оғир тан жароҳати олган ўзбекистонлик аёл ватанга қайтарилган, Россияда эри қамалиб, чақалоғи билан қийин аҳволда қолган аёлга ёрдам кўрсатилган эди.