БМТнинг Озиқ-овқат ва қишлоқ хўжалиги ташкилоти (FAO) Ўзбекистонда чигирткага қарши курашишни янада яхшилаш учун Қишлоқ хўжалиги вазирлиги ҳузуридаги Ўсимликлар карантини ва ҳимояси агентлигига 8 та махсус жиҳозланган Toyota Hilux автомобилини топширди. Бу ҳақда вазирлик матбуот хизмати хабар берди.
Шу муносабат билан бўлиб ўтган тадбирда таъкидланишича, Марказий Осиё қишлоқ хўжалиги учун чигирткалар жиддий хавф туғдираётганини кўпчилик ҳам билмайди.
“Ҳолбуки, экинларни йўқ қилиш орқали зараркунандалар ҳосил миқдори ва сифатини пасайтириши, аҳолини озиқ-овқат билан таъминлашни хавф остида қолдириши аниқ”, — дейилади хабарда.
Бундан ташқари, чигирткалар босқини қишлоқ хўжалигига бевосита боғлиқ бўлган фермерларнинг даромадларига салбий таъсир кўрсатади. Шу боис ушбу зараркунандаларга қарши курашиш Ўсимликлар карантини ва ҳимояси агентлигининг муҳим вазифаларидан бири ҳисобланади.
Мазкур кўмак FAOнинг “Марказий Осиёда чигирткаларга қарши курашишни такомиллаштириш (II босқич)” минтақавий лойиҳаси доирасида амалга оширилган.
Июль ойида Қозоғистоннинг қатор вилоятларида зарарли чигирткалар ҳужумига дуч келгани тўғрисида хабар берилганди. Ўзбекистон Ўсимликлар карантини ва ҳимояси агентлиги ахборот хизмати раҳбари Сабина Садинова бу каби ҳолат Ўзбекистонда ҳам кузатилиши мумкинми деган саволга жавоб берган.