Украина Қуролли кучлари аннексия қилинган Қримнинг Севастопол шаҳридаги Россия Қора денгиз флоти штаб-квартирасига ҳужум қилиш учун Storm Shadow ракеталаридан фойдаланган. Бу ҳақда Украина ҳарбий-ҳаво кучлари Sky News'га маълум қилди.
Россия Мудофаа вазирлиги 22 сентябрь куни давомида Украина ҳарбийлари Севастополга ракета зарбаси берганини, ҳужумни қайтариш вақтида ҳаво ҳужумидан мудофаа тизимлари бешта ракетани уриб туширганини маълум қилди. Зарба оқибатида Қора денгиз флотининг тарихий штаб-квартираси шикастланган. ОАВ ўн беш киши жароҳатлангани, бир ҳарбий хизматчи ҳалок бўлгани ҳақида хабар берди.
Шаҳарнинг Россия томонидан тайинланган губернатори Михаил Развожаевнинг хабар беришича, ракета бўлаклари Луначарский театри яқинига тушган. Флот штаб-квартирасида ёнғин содир бўлди. Шаҳар марказидаги ўнта тура жой биносининг ойналари синди.
Ижтимоий тармоқларда Севастополдаги Қора денгиз флоти қароргоҳига ракеталардан бирининг урилиши лаҳзаси акс этган видео тарқалди.
Storm Shadow — Британия ва Франциянинг ҳаводан учириладиган қанотли ракетаси, Францияда улар Scalp деб номланади. Уларнинг учиш масофаси 250–500 км.
Украина армияси жорий йилнинг баҳорида Буюк Британиядан Storm Shadowъларни қабул қилди, ёзда эса Франция ракеталарини олди. Украина Қуролли кучлари ушбу ракеталардан фойдаланиш учун совет самолётларини модернизация қилди: улар Донбасс, Запорожье ва Херсон вилоятларидаги нишонларга зарба бериш учун бир неча марта ишлатилган.
Изоҳ (0)