Ҳиндистон Космик тадқиқотлар ташкилоти (ISPRО) ҳозирда Прагян Ой ровери билан боғлана олмаётганини маълум қилди, деб ёзмоқда BBC.
Август ойида Ойга қўнган Прагян ровери икки ҳафта давомида маълумотлар ва тасвирларни йиғди. Қарийб 15 Ер куни давом этадиган Ой кечаси бошланиши билан Прагян “уйқу режимига” ўтказилди.
22 сентябрь куни қуёш чиқиб, луноход аккумуляторлари қайта зарядланганидан сўнг модуллар фаол режимга қайтиши кутилган эди.
Аммо Ой кечасидаги қаттиқ совуқ батареяларга зарар етказган бўлиши эҳтимоли бор. Шу сабабли Прагян билан алоқа узилиб қолган.
ISPRО алоқани тиклаш бўйича саъй-ҳаракатларни давом эттиришни режалаштирмоқда.
Эслатиб ўтамиз, 23 август куни Ҳиндистоннинг “Викрам” аппарати “Прагян” луноходи билан Ой юзасига муваффақиятли қўнганди. Луноход Ой юзасининг элементар таркиби ҳақида илғор билимларни тақдим этиши кутилмоқда.
Ҳиндистон миссияси тарихда биринчи марта Ер сунъий йўлдошининг кам ўрганилган жанубий қутби яқинига қўнишга муваффақ бўлди. Олимларнинг фикрича, бу ҳудудда муз ҳолатидаги сув ва қимматли элементларнинг катта захиралари бўлиши мумкин.
Россиянинг “Луна-25” станцияси август ойи охирида Ойга қўнмоқчи бўлган вақтда ҳалокатга учради.
Изоҳ (0)