Жиззах, Тошкент ҳамда Навоий вилоятларида ҳайдовчилик гувоҳномаларини пул эвазига олиб беришни ваъда қилган шахслар ушланди. Бу ҳақда Бош прокуратура ҳузуридаги департамент хабар берди.
Қайд этилишича, департамент ҳамда ДХХнинг Жиззах вилояти бошқармалари томонидан тезкор тадбир ўтказилди. Тадбирда “П.Ў.” УК ўргатувчи устаси Р.М. фуқаролар М.А. ва Р.М.га Фарғона вилоятидаги танишлари ёрдамида “Б”, “C” ва “Э” тоифадаги ҳайдовчилик гувоҳномаларини олиб бериши эвазига 1,3 минг долларни олган вақтида ашёвий далиллар билан ушланган.
Шу каби, департаментнинг Чиноз туман бўлими томонидан ИИБ ходимлари билан ҳамкорликда ўтказилган тезкор тадбирда Б.Т. исмли шахс фуқаро К.Б.га гўёки “Ватанпарвар” ташкилотида ишловчи танишлари ёрдамида имтиҳонларга қатнашмасдан ҳайдовчилик гувоҳномаси олиб бериши эвазига 1,1 минг долларни олган вақтида ашёвий далиллар билан ушланган.
Навоий вилоятида ўтказилган тадбирда эса А.А. исмли шахс фуқаро Ж.Р.га автомактабда ўқигани ҳақида маълумотнома тайёрлаб бериб, ҳайдовчилик гувоҳномасини олиш учун ўтказиладиган имтиҳонлардан гўёки ЙҲХБда ишловчи танишлари орқали ўтказиб қўйиши эвазига 1 000 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 25, 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан олдин Тошкент вилоятида сохта сертификат эвазига ҳайдовчилик гувоҳномаси олган фуқарога суд ҳукми ўқилганди. Унга Жиноят кодексининг 59-моддасига асосан тайинланган жазоларни қисман қўшиш йўли билан узил-кесил ўташ учун иш ҳақининг 20 фоизини давлат даромади ҳисобига ушлаб қолган ҳолда 2,5 йил муддатга ахлоқ тузатиш ишлари жазоси тайинланган. Май ўрталарида бўлса, Фарғонада 200 долларга “права” олиб беришни ваъда қилган автомактаб раҳбари ушланганди.
Изоҳ (0)