Ота-она фарзанди яхши таълим олиши, овқатланиши, касал бўлмаслиги ва дарс тайёрлаши учун керакли бўлган барча маълумотларни билади. Лекин фарзанд саломатлигига зарар етказиши мумкин бўлган айрим деталлар ҳақида бехабар бўлиши мумкин. “Домашний очаг” журнали қандай ўқув қуроллари бола соғлиғи билан боғлиқ муаммоларни келтириб чиқариши мумкинлиги ҳақида маълумот беради.
Мактаб сумкаси
Замонавий, ёрқин мактаб сумкаларининг кўпи, таркибида зарарли бўлган фталат ва қўрғошин бўлган винил ёки поливинилхлориддан тайёрланади. Мазкур бирикмалар бола териси билан мунтазам контактда бўлиши моддалар алмашинувининг бузилиши, астма ҳамда қандли диабетга олиб келиши мумкин. Мутахассислар мактаб сумкаларини харид қилишда табиий мато — пахта, зиғир толаси ёки нейлон ва полиэфир сингари синтетик толадан тайёрланганига эътибор қаратишни тавсия қилади. Ёрқин ва ялтироқ қўшимча ҳамда наклейкали сумкаларни ишлаб чиқаришда ҳам зарарли моддалар ишлатилгани боис бундай сумкалар сотиб олмаслик маслаҳат берилади.
Тушлик таоми солинадиган махсус қутилар
Пластик, хусусан, болалар таомини солиш учун мўлжалланган махсус идишларни ишлаб чиқаришда ҳам юқорида зарарли экани таъкидланган фталат моддаларни ўз ичига оладиган винилли пластиклар ишлатилади. Фталат пластикнинг эгилувчан ва мустаҳкамлигини таъминлайди, лекин шу билан бирга бир қанча жиддий касалликлар пайдо бўлишига сабаб бўлади. Гап шундаки, учувчан ҳисобланган ушбу моддалар таом ҳамда ичимликка аралашиши мумкин.
Рангли бўр қаламлари
АҚШда ўтказилган тадқиқот натижаларига кўра, аксари мактаб бўр қаламлари ва қалам маркаларида узоқ таъсири ўпка саратонини келтириб чиқариши мумкин бўлган асбест борлиги аниқланган. Мактаб ўқув-қуролларида асбест сезилмас даражада ишлатилганига қарамай, мутахассислар бола организмини ҳатто оз миқдордаги токсин таъсирида қолдириш керак эмас деган хулосага келган. Болалар учун зарарсиз ҳисобланган асалари мумидан тайёрланган бўр қаламларни ишлатиш тавсия қилинади.
Рангли фломастерлар
Кўп фломастерлар таркибида лейкемия, яъни оқ-қон касаллиги ҳамда жигар ва буйрак фаолиятини ёмонлашишига олиб келувчи — бензол бўлади. Узоқ вақт давомида бензол буғидан нафас олиш бош айланиши, оғриши ва уйқучанликка олиб келиши мумкин. Шу сабабдан мактаб бозори қилиш вақтида таркиби ва нимадан тайёрланганини яхшилаб ўрганинг. Бензолни ичига оладиган ўқув-қуролларни харид қилманг.
Изоҳ (0)