Россия ҳарбийларининг 19 сентябрга ўтар кечаси Лвовдаги саноат корхонасига берган дрон ҳужуми оқибатида 300 тонна гуманитар ёрдам ёниб кетди. Бу ҳақда БМТнинг Украинадаги гуманитар координатори Денис Браун баёнотига таяниб, “РБК-Украина” хабар берди.
“Лвов шаҳридаги ‘Каритас Спес’ нодавлат ташкилоти омборини вайрон қилган Россия ҳаво ҳужумини кескин қоралайман. Тахминан, 300 тонна инсонпарварлик ёрдамини ўз ичига олган муҳим гуманитар объект бутунлай ёниб кетди”, — деди Денис Браун.
БМТ координаторининг таъкидлашича, гуманитар активларга ҳужумлар йил давомида кучайган ва урушнинг даҳшатли оқибатларидан азият чекаётганларга таъсир ўтказмоқда. У гуманитар ходимлар, объектлар ва мулклар халқаро гуманитар ҳуқуқ билан ҳимояланганини эслатди.
“Халқаро гуманитар ҳуқуқ танлов эмас, бу ҳурмат қилиниши керак бўлган мажбурият”, — деди Браун.
19 сентябрь куни Лвовнинг ўққа тутилиши
Украинадаги оммавий отишма пайтида Лвовга 18 та камикадзе дрон ҳужум қилди, улардан 15 таси уриб туширилди. Оқибатда катта ёнғин чиқди, икки киши вайроналар остидан олиб чиқилди, эркакнинг аҳволи оғир.
Кейинчалик вайроналар остидан омборда ишлаган эркакнинг жасади чиқариб олингани айтилди. Лвов мери Андрей Садовийнинг сўзларига кўра, ёнғин гуманитар ёрдам ва озиқ-овқат сақланадиган омборларда содир бўлган ва “оқибати жуда мураккаб”.
Изоҳ (0)