“Дарё”да Тошкент шаҳрининг Яшнобод туманида 9 та хонадонни 39 кишига пуллаган МЧЖ раҳбарининг қилмишлари ҳикоя қилинганди. Шундан сўнг Бош прокуратура ҳолат юзасидан терговга қадар текширув бошланганини очиқлади. Бош прокуратуранинг қўшимча қилишича, ўрганишлардан сўнг мазкур иш бўйича жиноят иши қўзғатилган.

Яшнобод туманидаги уй-жой билан боғлиқ фирибгарлик содир қилингани ҳақидаги мақолада кўрсатилган ҳолатлар юзасидан терговга қадар текширув ҳаракатлари ўтказилди. Аниқланишича, “З.Г.” МЧЖ раҳбари А.А. хонадон сотиб олиш истагини билдирган 23 нафар фуқаро билан сохта олди-сотди шартномалари тузиб, фуқароларнинг жами 4 миллиард сўмдан ортиқ пул маблағларини фирибгарлик йўли билан қўлга киритган. Қурилишни тугатмасдан, хонадонларни фуқароларга расмийлаштириб бермасдан, ўзганинг жуда кўп миқдордаги пул маблағларини талон-торож қилган, — дейилади Бош прокуратура ахборотида. 

Қўшимча қилинишича, мазкур ҳолат юзасидан Жиноят кодексининг 168-моддаси (фирибгарлик) ва бошқа моддалар билан жиноят иши қўзғатилиб, дастлабки тергов ҳаракатларини олиб бориш учун ички ишлар органига юборилган.

Бош прокуратура ахборот хизмати раҳбари Ҳаёт Шамсутдиновнинг “Дарё”га аниқлаштиришича, дастлабки тергов ҳаракатларини Яшнобод туман ИИБ олиб боради.

Эслатиб ўтамиз, Zohmir Group номли қурилиш компанияси шаҳарнинг Яшнобод туманидаги янги қурилаётган 9 та хонадондан иборат уч қаватли уйларини 39 нафар фуқарога пуллаган.

Қурилиш ташкилоти бизга ваъда қилган уйларни 2022 йилнинг май—июнь ойида топшириши керак эди. Лекин 2023 йил келди ҳамки, уй қурилиши қандай ҳолатда бўлса, шундай турибди. Ҳеч нарса ўзгармаган. Биз айтилган муддатдан ўтгач, қурувчидан уйимиз қани, қачон тайёр бўлади, деб сўраганимиздан сўнг, бошқа қизиқ-қизиқ муаммолар пайдо бўлмоқда. Аниқланишича, бизга сотилган уйлар яна 4-5 кишига сотилган экан, — деганди “Дарё” журналисти билан суҳбатлашган мурожаатчилар.