Вакиллар палатаси Жо Байденга қарши импичмент эълон қилиш учун текширув бошлади

АҚШ Конгресси Вакиллар палатаси спикери, республикачи Кевин Маккартининг маълум қилишича, палата қўмиталари АҚШ президенти Жо Байденга қарши импичмент жараёнини бошлашга сабаб бўлиши мумкин бўлган терговга киришди. Бу ҳақда Associated Press хабар бермоқда.

Маккартининг сўзларига кўра, Вакиллар палатасининг сўнгги ойларда Байден оиласига нисбатан олиб борган текшируви “коррупция маданияти”ни аниқлаган, бу эса чуқурроқ текширишни талаб қилади.

“Булар ҳокимиятни суиистеъмол қилиш, қонунни қасддан бузиш ва коррупция айбловлари”, — деди Маккарти.

Терговга раҳбарлик Суд-ҳуқуқ қўмитаси, Назорат ва масъулият қўмитаси ҳамда “Йўллар ва чора-тадбирлар” қўмитасига юклатилди. AP таъкидлаганидек, бу қўмиталар бир неча ой давомида Жо Байден оиласи билан боғлиқ турли текширувлар бўйича бирга ишламоқда, бироқ ҳозирча АҚШ президентининг уларга алоқадорлигини тасдиқлаганича йўқ.

Оқ уй Кевин Маккартнининг баёнотини “энг ёмон ҳолатда экстремал сиёсат” деб атади.

“Республикачилар палатасида тўққиз ой давомида президент устидан тергов олиб борилди ва улар қонунбузарлик ҳақида ҳеч қандай далил топмади. Бу ҳақда Республикачилар партияси аъзоларининг ўзлари маълум қилган”, — деди Оқ уй матбуот котиби Ен Семс.

Ҳозирда Вакиллар палатасини деярли тўлиқ назорат қилаётган республикачилар Жо Байденни 2009—2017 йилларда вице-президент бўлиб ишлаган вақтида ўғли Хантернинг хориждаги бизнесларидан фойда кўрганликда айбламоқда. Республикачилар ҳеч қандай далил келтирмаган. Жо Байден республикачиларнинг баёнотларини масхара қилди.

Республикачилар партияси вакиллари АҚШ президентининг ўғлини турли жиноятларда айбламоқда: гиёҳванд моддаларни истеъмол қилишдан тортиб, коррупсион схемаларда иштирок этиш ва отасининг таъсири остида савдо қилишгача. Республикачилар фикрича, Жо Байден маъмурияти президентнинг ўғлига қарши қўйилган айбловларни кўриб чиқишда анча юмшоқлик қилмоқда.

Вакиллар палатаси 2019 ва 2021 йилларда (ўша пайтда у демократлар томонидан назорат қилинган) икки марта АҚШнинг 45-президенти Дональд Трампга импичмент эълон қилган, бироқ икки мартада ҳам уни Сенатда оқлашган.