Дания Украинага 5,8 миллиард Дания крони (тахминан 830 миллион доллар) миқдорида янги ҳарбий ёрдам пакетини тайёрламоқда. Унга танклар, пиёдалар жанговар машиналари, танк ўқ-дорилари ва зенит мажмуалари киради.
Бу ҳақда Дания Мудофаа вазирлиги матбуот хизмати хабар берди. Қайд этилишича, бу тўплам 12-пакет бўлади ва Россиянинг Украинага ҳужумни бошлаганидан бери энг йириги бўлади.
“12-ёрдам пакети Украина жамғармаси томонидан молиялаштирилади ва халқаро ташкилотлар билан ҳамкорликда Украина мудофаасини қўллаб-қувватлаши мумкин бўлган бир қатор қурол ва мажмуаларни тақдим этади”, дейилади баёнотда.
Қайд этилишича, Украина учун ушбу ҳарбий ёрдам пакети Молия қўмитаси томонидан тасдиқланиши керак.
“Украина Россиянинг босқинидан ўзини ҳимоя қилишда давом этиши учун Дания каби давлатлар Украинага ҳарбий ва молиявий ёрдам кўрсатишда давом этиши мутлақо зарур”, деди Дания мудофаа вазири Троeлс Лунд Поулсен.
Унинг таъкидлашича, ушбу ҳарбий ёрдам пакети “янги босқич”га ўтишдан далолат беради. Бир ярим йилдан ортиқ давом этган кенг кўламли урушдан сўнг Дания Мудофаа вазирлиги захираларини деярли тугатди, деди Троeлс Лунд Поулсен. Шу муносабат билан, мамлакат халқаро ташкилотлар билан ҳамкорликда Украина эҳтиёжларига мослаштириладиган мақсадли қўшма харидларни кўриб чиқмоқда.
Изоҳ (0)