Жеки Чан ижодга қайтди: севимли актёр иштирокидаги 2 та янги фильм таҳлили

7 сентябрь куни онлайн кинотеатрларда Жеки Чан иштирокидаги “Яширин зарба” жанговар фильми пайдо бўлди. Бу актёрнинг бу йил ҳисобидан экрандаги иккинчи тўлиқ метражли чиқиши – “Кунг-фу айғир” картинаси бир оз олдин чиққанди.

“Кунг-фу айғир”

Лу (Чан) бир пайтлар энг қийин ва хавфли трюкларни ижро этган каскадёр бўлган, бироқ сўнгги йилларда унинг жисмоний фаоллиги пасайган. Оғир жароҳати туфайли кинони тарк этишга мажбур бўлганидан кейин қарзга ботиб қолган ва онасининг ўлимидан сўнг ундан ранжиган қизи Сяо Бао (Лиу Хаоцун) у билан гаплашмай қўйган. Лунинг ягона қувончи – Олов лақабли севимли оти. Улар биргаликда сайёҳлар билан суратга тушиб, тирикчилик учун пул топишади. Аммо бир муаммо бор: коллекторлар отни олиб кетмоқчи. Шу сабабли Лу ғурурини бир четга суриб, ҳуқуқ факультетида таҳсил олаётган қизидан ёрдам сўраши керак.

Бу Жеки Чан иштирокидаги жонли фильмларни жуда соғинганлар учун носталгик фильм. Жеки Чан иштирокидаги ҳақиқий фильмлардан олинган кадрлар эса йиғлатиши мумкин. Айтганча, мазкур фильм автобиографик характерга эга: актёрнинг ҳам никоҳсиз қизи билан муносабатлари яхши бўлмаган.

“Яширин зарба”

Келажакда Яқин Шарқ хавфли чўлга айланади, нефть эса дунёдаги энг қиммат товар ҳисобланади. Террорчилар Хитойда ёнувчи суюқлик ишлаб чиқарадиган заводни эгаллаб олишга, компания бошлиқлари эса компания ходимларини эвакуация қилишга уринмоқда. Бунинг учун улар тажрибали жангчи Аждар Лу (Чан) бошчилигидаги гуруҳни ёллашади. Ёвуз ёлланма аскарлар томонида собиқ америкалик денгиз пиёдаси Крис Ван Хорн (Жон Сена) ўзининг акаси Генри (Амадеус Серафини) уни алдаётганини тушуниб, Аждар Лу томонга ўтади. Хорн ва Лу заводнинг қўлга олинган ходимларини қутқаришга ҳаракат қилишади.

Қадимги кунг-фу жанговар фильмлари мухлислари учун фильмда ажойиб саҳналар мавжуд. “Яширин зарба” композиция жиҳатдан “Телба Макс”га ўхшаб кетади: жазирама чўл, машина пойгалари, уюм-уюм темир-терсаклар — бир сўз билан айтганда, пост-апокалиптик илмий фантастиканинг барча атрибутлари шу ерда. Айтганча, “Кунг-фу айғир” фильмидаги каби бу картинада ҳам Чаннинг қаҳрамони қизи билан муносабатларини яхшилашга ҳаракат қилади.