Польша жанубида, Украина билан чегарадош Жешов шаҳрида легионеллез (“легионерлар касаллиги”)дан вафот этганлар сони ўн бир нафарга етди, деб хабар бермоқда РМФ ФМ Жешов давлат санитария инспекциясига таяниб.
Касаллик қурбонлари 64 — 95 ёш оралиғида бўлган. Ҳозиргача шаҳарнинг 144 нафар фуқаросида ушбу бактерия тасдиқланган.
Польша Ички хавфсизлик агентлиги легионеллез инфекциясининг сўнгги тўлқинини “диверсантлик натижаси” деб айтишга асос йўқлигини хабар қилди.
Жешовда биринчи инфекция ҳолатлари ўтган ҳафтада қайд этилган. Соғлиқни сақлаш инспектори Марек Пособкевичнинг сўзларига кўра, инфекцияни қўзғатувчи Легионелла бактерияси шаҳар сув таъминоти тизими орқали тарқалган бўлиши мумкин.
“Легионерлар касаллиги” нима?
Легионеллез ёки “легионерлар касаллиги” — Легионелла турига мансуб ҳар хил микроорганизмларни келтириб чиқарадиган ўткир юқумли касаллик. У кучли иситма, умумий интоксикация (заҳарланиш), ўпка, марказий асаб тизими ва овқат ҳазм қилиш органларининг шикастланиши билан кечади. Legionella pneumophila биринчи марта 1977 йилда аниқланган, у Филадельфиядаги Америка легиони съезди иштирокчилари орасида тарқалган ўткир пневмония сабабчиси деб топилган.
Жаҳон соғлиқни сақлаш ташкилоти маълумотларига кўра, инфекциянинг энг кенг тарқалган усули бу бактерияли сувдан олинган ифлосланган аэрозоллардан нафас олиш. Аэрозол манбаларига кондиционер совитиш мосламалари, иссиқ ва совуқ сув тизимлари, намлагичлар ва гидромассаж ванналари киради.
Изоҳ (0)