Таиланд собиқ бош вазири Таксин Чинават 15 йил чет элда юрганидан сўнг мамлакатга қайтиши билан дарҳол ҳибсга олинди. 2008 йилда у коррупцияда айбдор деб топилиб, қидирувга берилганди.
BBC хабарига кўра, у қамоқхонанинг махсус тиббий асбоб-ускуналар жойлашган қисмидаги камералардан бирида сақланади. Бундай қарорга келинишида собиқ бош вазирнинг ёши ҳам инобатга олинди. Ҳозирда у 74 ёшда, унга тиббий ёрдам зарур бўлиб қолиши мумкин.
Таксин Чинават 2001 йилда Таиланд ҳукумати бошига келган. 2006 йилда у БМТ йиғилишида қатнашиш учун Нью-Йоркка ташриф буюрганда, Таиландда ҳарбий тўнтариш содир бўлди, натижада бош вазир лавозимидан четлатилди.
Шундан сўнг Чинават қисқа муддатга Таиландга қайтди, бироқ 2008 йилда коррупция ва монархияга хиёнатда айбланганидан сўнг шошилинч равишда мамлакатни тарк этди.
Собиқ бош вазир оиласи билан шахсий самолётда Бангкокка учиб келди. У 20 йилдан ортиқ вақт давомида Таиланддан ташқарида яшаган бўлса ҳам, сиёсатида кучли шахс бўлганлиги сабабли уни кўплаб тарафдорлари аэропортда кутиб олди.
Кўпчилик унинг қайтиши “Пҳя Тҳаи” партияси бошчилигида янги ҳукумат шаклланишига сабаб бўлади, деб умид қилаётганди. Аммо унинг аэропортдаёқ ҳибсга олиниши бу умидларни пучга чиқарди.
Шунга қарамай, кўпчилик Таиланднинг энг муваффақиятли сайланган сиёсий етакчиси сифатида эътироф этилган Таксин Чинават суд тизими билан келишувга эришганига ишонади. У қисқа вақт панжара ортида ўтказиб, озодликка чиқиши мумкинлиги айтилмоқда.
Изоҳ (0)