Шавкат Мирзиёев 20 август куни Венгриянинг Будапешт шаҳрида енгил атлетика бўйича жаҳон чемпионатига ташриф буюриб, унинг доирасида қатор хорижий делегациялар раҳбарлари билан фикр алмашди.
Президент матбуот хизматининг хабар қилишича, Шавкат Мирзиёев Қатар давлати амири Тамим бин Ҳамад ал-Соний, Озарбайжон президенти Илҳом Алиев, Қирғизистон президенти Садир Жапаров, Туркманистон президенти Сердар Бердимуҳамедов, Сербия президенти Александр Вучич ва Татаристон раиси Рустам Минниханов билан суҳбатлашди. Икки томонлама амалий ҳамкорликнинг долзарб масалалари юзасидан фикр алмашилди.
Шунингдек, етакчилар жаҳон чемпионатининг эркаклар ўртасида 100 метр масофага югуриш бўйича финал баҳсини томоша қилди.
Енгил атлетика бўйича ХIX жаҳон чемпионати Будапешт шаҳрининг Енгил атлетика миллий марказида 2023 йил 19 август куни бошланган бўлиб, 27 августгача давом этади. Чемпионатда Ўзбекистондан 5 нафар атлет спортнинг баландликка сакраш, уч хатлаб сакраш, узунликка сакраш, еттикураш ва марафон каби турларида куч синашмоқда.
Ўзбекистон президенти, шунингдек, Венгриянинг давлат байрами – авлиё Иштван кунига бағишланган тадбирларда иштирок этди.
Ташриф тадбирлари якунлангач, давлат раҳбари рафиқаси билан Тошкентга жўнаб кетди.
Эслатиб ўтамиз, Венгрия бош вазири Виктор Орбан таклифига биноан 19 август куни рафиқаси билан бирга амалий ташриф билан Будапешт шаҳрига борган Шавкат Мирзиёев Виктор Орбан ва Туркия президенти Ражаб Тоййиб Эрдўғон билан учрашувлар ўтказди ҳамда OTP банки бошқаруви раиси Шандор Чанини қабул қилди.
Изоҳ (0)