Тошкент вилояти ҳокими Зоир Мирзаев Қибрай тумани ҳокими ўринбосарлари, ҳокимликнинг бошқа барча мутахассисларини вазифасидан озод қилгани ҳақида хабар берилган эди. Ҳоким уларнинг лавозимидан озод қилинишига изоҳ берди.
Зоир Мирзаевнинг сўзларига кўра, кўплаб ходимлар ер сотишни, қарорни сохталаштиришни касб қилган. Бунга эса фақат туман ҳокимигина эмас, бошқа масъул шахслар ҳам жавоб бериши керак. Ҳоким барчаси қонунчилик даражасида кўриб чиқилишини қайд этди.
“Ходимларини ҳам ишдан олиб ташлаймиз. Эрталабдан буён менга Facebook’да кимни олиб келишимни сўраб, ёзишяпти. Қўрқма, Қибрайнинг йигит-қизларини олиб келамиз, деб ёздим. Майли, кесатади-да. Лекин, кечирасиз, ер сотишни касб қилган бўлса, қарорни сохталаштиришни касб қилган бўлса, бугун туман ҳокими шу учун жавоб беряпти. Ходимлар-чи? Уларнинг ўринбосарлари-чи? Ҳаммасини қонунчилик доирасида олиб бориб, ҳаммасига жавоб берамиз.
Умуман маълумотлар тўғри келмайди. Ариза ва шикоятлар билан қаноатлантириш даражаси 28 фоиз. Ариза билан шуғулланадиган ходимларнинг ҳаммасига жавоб бериб юборса бўлади. Инвестиция дастурига кирган объектнинг назорати йўқ, мактаб-боғчалар устидан назорат йўқ.
Мен протокол қилиб, мажлис қиламан, десам қўрқаман. Ҳар бир вараққа қўл қўйиб чиқаман кейин. Тиқворади орасига, ҳеч нарсадан қайтмайди. Ҳаммасида шунақа. Битта туманни қилсак, натижа берадиган бўлса, бошқа туманларда ҳам шундай қиламиз. Булар бутунлай ўз хўжалиги қилиб олган. Мен мажбур бўлдим, барибир охирига етамиз”, — дейди Зоир Мирзаев.
17 август куни бўлиб ўтган Қибрай тумани кенгашининг навбатдан ташқари сессиясида Зоир Мирзаев Қибрай тумани ҳокимининг ўринбосарлари, ҳокимликнинг бошқа барча мутахассислари вазифасидан озод қилиниши, уларнинг фаолиятига ҳуқуқий баҳо берилиб, “тоза” чиқса, кейин ишини давом эттиришини маълум қилган.
Шунингдек, Қибрай туманидаги ҳуқуқ-тартибот идораларидан ташқари барча давлат ташкилотларининг раҳбарлари ҳам лавозимидан озод қилинди. Уларнинг фаолиятига ҳам бир ҳафта ичида баҳо берилади.
Изоҳ (0)