Шавкат Мирзиёев Қурилиш соҳаси ходимлари куни муносабати билан қурувчиларга табрик йўллади 

Ўзбекистонда август ойининг иккинчи якшанбаси қурилиш соҳаси ходимлари куни сифатида нишонланади. Шу муносабат билан Шавкат Мирзиёев мамлакат қурилиш соҳаси ходимларига табрик йўллади. Табрик матни президент матбуот хизмати томонидан эълон қилинди.

Президент ўз табригида қурувчиларни касб байрамингиз билан чин қалбдан табриклаб, уларнинг барчангизга самимий ҳурмат ва эзгу тилакларини билдирди. Давлат раҳбари халқ манфаатини ўйлаб мустаҳкам ва кўркам иморатлар қуриш, равон йўл ва кўприклар бунёд этиш дунёдаги энг савобли ва хайрли ишлардан бири деб атади. 

Қайд этилишича, ўтган етти йил давомида Ўзбекистонда қурилиш ишлари ҳажми бир неча баробар ортиб, 2016 йилдаги 30 триллион сўм ўрнига 2022 йилда 131 триллион сўмга, 2023 йилнинг биринчи ярмида эса 68 триллион сўмга етди. 

Бу, президент табригида таъкидланишича, Ўзбекистон бунёдкорлари қисқа даврда қандай катта йўлни босиб ўтганидан далолат беради.

“Бугунги кунда мамлакатимиз қурилиш соҳасида ҳам янги давр бошланди, десак, тўғри бўлади. Аввало, соҳанинг ҳуқуқий ва моддий-техник базаси мустаҳкамланиб, республикамизнинг барча ҳудудларида илғор технология ва ёндашувлар асосида фаолият юритадиган янги-янги қурилиш ташкилотлари пайдо бўлаётгани, қурилиш материаллари индустрияси юқори суръатлар билан ривожланаётгани, малакали етук кадрлар тайёрлаш тизими йўлга қўйилгани шундай деб айтишга асос беради”, — дейилади табрикда.

Қайд этилишича, қурилиш соҳасида замонавий ахборот-коммуникация технологияларини кенг жорий этиш орқали қурилиш жараёнларининг барча босқичларида жамоатчилик назоратини кучайтириш, сифат ва самарадорликни ошириш, заҳматкаш қурувчиларнинг меҳнат ва турмуш шароитларини яхшилаш, уларни ҳар томонлама рағбатлантириш масалалари бундан буён ҳам доимий эътибор марказида бўлиб қолади.

Сиз, азизларни, мамлакатимиз қурилиш соҳасини тараққий эттиришга муносиб ҳисса қўшиб келаётган барча юртдошларимизни бугунги касб байрамингиз билан яна бир бор чин юракдан муборакбод этаман. Сизларга мустаҳкам соғлик, шарафли ва масъулиятли фаолиятингизда янги-янги ютуқлар, оилавий бахт, хонадонларингизга тинчлик, файзу барака тилайман. Жонажон Ўзбекистонимиз, шаҳар ва қишлоқларимизнинг ободлиги, халқимиз фаровонлиги йўлида қилаётган меҳнатларингизнинг роҳатини кўринг! Қўлингиз асло дард кўрмасин, азиз дўстлар!”, — дейилади президент табрикида.