Тожикистоннинг Хатлон вилоятидан ўтган Душанбе—Кўлоб—Хорўғ автомобиль йўлида 6 август куни кечқурун даҳшатли авария юз берди. Ҳодисада 10 киши ҳалок бўлди, 13 киши жароҳатланди, деб хабар бермоқда Asia-Plus портали. Юк машинаси бир нечта енгил машиналарни босиб кетган, сўнг уйларга бориб урилган.
Вилоят соғлиқни сақлаш бошқармаси суҳбатдошининг порталга айтишича, дастлабки маълумотларга кўра, ўн киши ҳалок бўлган, 13 киши жароҳатланган. Улардан икки нафарига биринчи тиббий ёрдам кўрсатилган, қолганлари касалхонага ётқизилган.
Республика президенти ҳузуридаги Фавқулодда вазиятлар қўмитаси 14 киши жабрланганини маълум қилди.
Тожикистон Ички ишлар вазирлиги маълумотларига кўра, ҳодисага юк машинасининг тормози ишламай қолгани сабаб бўлган. ЙТҲ бўйича жиноят иши қўзғатилди. Тожикистон президенти Имомали Раҳмон номидан ички ишлар вазири ва соғлиқни сақлаш вазири воқеа жойига етиб келган.
Аввалроқ Қозоғистоннинг Туркистон вилоятида юз берган йирик авария оқибатида тўққиз киши ҳалок бўлганди.
Изоҳ (0)